Ánshi Dımash Qudaıbergenniń jankúıerleri Ispanııada bas qosty
ASTANA. KAZINFORM – Madrıdte qazaqstandyq ánshi Dımash Qudaıbergenniń jankúıerleriniń kezdesýi ótti. Іs-sharaǵa Ispanııanyń túkpir-túkpirinen, sondaı-aq Germanııa men Shveıtsarııadan da jankúıerler jınaldy. Bul Dombyra kúnine oraı ıspan men qazaq mádenıetin biriktiretin mańyzdy is-shara boldy, dep jazdy dimashnews.com.
Mártebeli qonaqtardyń qatarynda Qazaqstannyń Ispanııadaǵy elshiliginiń ókilderi, onyń ishinde elshi Danat Musaev, birinshi hatshy Qýanysh Ábpasov, Mádenıet jáne týrızm basqarmasynyń basshysy Raıymbek Toqtaýbaev boldy. Sondaı-aq, ıspandyq jankúıerlerge qazaq tilinen onlaın sabaq berip júrgen professor Sandý Toqtaýbaeva da qatysýshylardyń ystyq yqylasyna bólendi.
Dombyra kúnin atap ótý úshin Qazaqstan Elshiligi kontsert uıymdastyryp, onda balalar dástúrli aspapta ár túrli týyndylar oryndady. Alınur men Álıhan Amangeldi men Dáýlet Ismaılovtar ónerlerin pash etip, qazaq mýzykasynyń rýhyn jetkizip, kórermenderdi ónerlerimen baýrap aldy.
Ispanııadaǵy qazaq dıasporasynyń ókili Gúlnara Gýlcha qonaqtarǵa qazaqtyń ulttyq taǵamdaryn aýyz tıgizip jáne ulttyq kıimderimen tanystyrdy.
Sharaǵa Dımashqa arnalǵan týyndylaryn usynǵan fan-art sýretshisi Hose Býson; Baqytty Bala 2023 jeńimpazy Lıýsııa Kasanı; jáne La Voz Kids 2023 fınalısti Jalen Alı syndy arnaıy qonaqtar da qatysty. Jas ánshiler án oryndap, ádemi keshti jandandyrdy. Al, keshtiń sońynda oryndalǵan nómir kórermenderdi erekshe qýanyshqa bóledi.
Dımash Qudaıbergen jankúıerleriniń Madrıdtegi kezdesýi tek mýzyka merekesi ǵana emes, mádenıetter birliginiń sımvolyna aınaldy.
