Ánshi Beıonseniń fılmi rekord ornatty

Jeltoqsan aıynyń alǵashqy demalys kúnderi Amerıka kınoteatrlarynyń kassalarynda ánshi Beıonseniń “Renaissance: A Film by Beyoncé" fılm-kontsertine bıletter rekordty kólemde satyldy. Kazinform bul týraly Euronews-ke silteme jasap habarlaıdy.

AMC Theaters baǵalaýy boıynsha, jeksenbi, 3 jeltoqsan kúni ánshiniń fılmine bıletter jalpy somasy 21 mln dollarǵa satylyp, kassalyq túsim boıynsha Soltústik Amerıkada birinshi orynǵa ıe boldy.

Beıonseniń “Renaissance: A Film by Beyoncé" kartınasy AQSh pen Kanadanyń 2 539 kınoteatrynda, sondaı-aq álem boıynsha 2621 kınoteatrda prokatqa shyqty. Fılm tek halyqaralyq kórsetilimderden 6,4 mln dollar tabys tapty.

Atalǵan fılmde ánshiniń dúnıejúzi boıynsha gastrolindegi kontsertteri beınelengen. Onyń Gremmı alǵan albomynyń qurmetine ótkizilgen «Oıaný» atty týrnesi osy jyldyń mamyr aıynda Shvetsııanyń Stokgolm qalasynan bastalyp, bıyl kúzde Mıssýrı shtatynyń Kanzas-Sıtı qalasynda aıaqtaldy. Beıonse týr barysynda 39 qalada 56 kontsert berip, 500 mln dollardan astam tabys tapty. Bul shoýlar jalpy alǵanda 2,7 mln kórermenniń nazaryn ózine aýdartty.