Ánshi Akmal ótpeı qalǵan kontsertine bılet alǵan turǵyndardyń shyǵynyn qaıtarmaǵan

ASTANA. KAZINFORM – SQO boıynsha Saýda jáne tutynýshylar quqyqtaryn qorǵaý departamenti Qostanaı qalasynda ótpeı qalǵan ánshi Akmaldyń kontsertine qatysty azamattarǵa bılet aqshasyn qaıtarý máselesimen aınalysyp jatyr.

Málimetke sáıkes, 2025 jyldyń 18 qarashasynan bastap departamentke 25 qazanda Qostanaıda ótýi tıis bolǵan kontserttiń ótpeı qalýyna baılanysty 100-den astam ótinish túsken.

Tutynýshylar bıletterdi eventticket.kz elektrondy servısi arqyly satyp alǵan. Bul — elektrondyq formatta aqyly qyzmet kórsetý sharty jasalǵanyn bildiredi. Alaıda kontsert belgilengen kúni ótkizilmeı, uıymdastyrýshy bılet qunyn qaıtarmaǵan.

Ótinishterdi qaraý nátıjesinde departament tutynýshylardyń quqyqtaryn qorǵaý týraly zańnama talaptarynyń buzylǵanyn anyqtady. Osyǵan baılanysty kontsertti uıymdastyrýshy — jeke kásipkerge barlyq zardap shekken azamattarǵa bılet qunyn tolyq kólemde qaıtarý týraly resmı habarlama joldandy. Uıymdastyrýshy tutynýshylarǵa 6 mıllıon teńgeden astam qarjy qaıtarýy tıis.

«Eger qarajatty qaıtarý týraly talap oryndalmaǵan jaǵdaıda, departament QR „Tutynýshylardyń quqyqtaryn qorǵaý týraly“ Zańynyń 5-baby 8-tarmaǵyna sáıkes, satyp alynǵan bıletterdiń aqshasyn qaıtarý máselesi boıynsha sotqa júginedi», - dedi SQO boıynsha Saýda jáne tutynýshylardyń quqyqtaryn qorǵaý departamentiniń basshysy Qanat Jeńisbekuly.

Vedomstvo jaǵdaıdy baqylaýda ustap otyr jáne azamattardy óz quqyqtary buzylǵan jaǵdaıda jedel habarlasýǵa shaqyrady.

Aıta keteıik, Aqbota Kerimbekova kelesi jyly jeke shyǵarmashylyq kontsertin ótkizbek.