«Ańsaǵan sábı»: Jasandy uryqtandyrýmen qansha bala dúnıege keldi
Qazaqstanda bedeýlikten zardap shegetin patsıentterdiń mindetti medıtsınalyq saqtandyrý júıesinde (MÁMS) ekstrakorporaldy uryqtandyrý (EKU) arqyly medıtsınalyq kómek alý quqyǵy zańnamalyq túrde bekitilgen.
Memleket basshysy halyqqa Joldaýynda Úkimetke 2021 jyldan bastap EKU-ǵa kvotalardy 7 esege arttyra otyryp, «Ańsaǵan sábı» arnaıy baǵdarlamasyn iske qosýdy tapsyrǵan bolatyn.
Qazir fertıldi jastaǵy áıelder men erlerdiń sanyn eskere otyryp, óńirler boıynsha EKU júrgizýge jyl saıyn 7 000 kvota bólinedi.
Áleýmettik medıtsınalyq saqtandyrý qory (ÁMSQ) medıtsınalyq uıymdar bólinisinde EKU qyzmetteriniń kólemin ornalastyrdy. MÁMS sheńberinde memlekettik qyzmetti 19 klınıka (onyń ishinde 3 memlekettik, 16 jeke) usynady.
Sondaı-aq mınıstrlik aı saıyn oryndalǵan baǵdarlamalardyń tıimdiligine monıtorıng júrgizip otyrady.
«Ańsaǵan sábı» baǵdarlamasy iske asyryla bastaǵan 2022-2023 jyldary EKU 19 myńnan astam áıelge jasaldy. 7 myńnan astam áıel júkti boldy, 3 800 otbasynda 4 500-den astam náreste dúnıege keldi, 2 500 áıel júktilik kezeńinde.
Bıyl óńirlerge barlyǵy 7 000 kvota bólindi.
Málim etilgendeı, Qazaqstan qosalqy reprodýktıvti tehnologııalardy qoldana otyryp, bedeýlikti emdeýde aldyńǵy qatarda. Elde gınekologııa, andrologııa, genetıka, embrıologııa, perınatologııadaǵy sońǵy tehnologııalar qoldanylyp keledi.
«Alaıda, bedeýlik – bul kóbine aldyn alýǵa bolatyn jáne osylaısha qymbat emdeýge degen qajettilikti tómendetetin aýrý bolyp tabylady.
Sondyqtan mınıstrliktiń birinshi kezektegi mindeti – jasóspirimder men jastarǵa profılaktıka jáne jynystyq bilim berý baǵdarlamasyn jetildirý. Bul jynystyq jolmen beriletin ınfektsııanyń aldyn alý jáne emdeý, qaýipti aborttardyń aldyn alý, kontratseptsııamen qamtý jáne salamatty ómir saltyn nasıhattaý bolyp tabylady», - delingen mınıstrlik habarlamasynda.
