«Ańsaǵan sábı»: Túrkistan oblysyna bıyl qansha kvota bólindi
TÚRKІSTAN. KAZINFORM — Túrkistan oblysynda «Ańsaǵan sábı» baǵdarlamasy aıasynda keıingi bes jylda ekstrakorporaldy uryqtandyrý (EKU) nátıjesinde 1 myńǵa jýyq sábı dúnıege keldi.
Oblystyq densaýlyq saqtaý basqarmasynyń málimetinshe, 2021-2025 jyldar aralyǵynda óńirge EKU júrgizýge 2 615 kvota bólinip, onyń bári tolyq ıgerilgen. Kvota alǵan áıelderdiń 77 paıyzy — aýyldyq jerdiń turǵyndary.
— «Ańsaǵan sábı» baǵdarlamasyn iske asyrýdyń bes jyly ishinde Túrkistan oblysynda kvotalyq EKU baǵdarlamalarynyń nátıjesinde 988 sábı dúnıege keldi. Onyń ishinde 87 egiz jáne 3 úshem bar, — delingen basqarma usynǵan aqparatta.
Vedomstvo habarlaýynsha, bıyl baǵdarlama aıasynda Túrkistan oblysyna mindetti áleýmettik medıtsınalyq saqtandyrý (MÁMS) júıesi arqyly EKU júrgizýge 652 kvota bólindi.
— 2026 jyldyń alǵashqy alty aıynda oblysta 234 erli-zaıypty jup kvota alyp, EKU baǵdarlamasynan ótý úshin klınıkalarǵa joldandy, — dedi basqarma ókilderi.
Buginde Qazaqstanda EKU boıynsha kvotalyq baǵdarlamalardy júzege asyratyn 19 klınıka jumys isteıdi. Onyń úsheýi Shymkent qalasynda ornalasqan. Mamandardyń aıtýynsha, bul oblys turǵyndaryna medıtsınalyq tekserýden ótip, EKU baǵdarlamasy boıynsha em alý úshin elimizdiń shalǵaı óńirlerine barmaı-aq qajetti qyzmetti alýǵa múmkindik beredi.
Buǵan deıin Pavlodar oblysynda EKU kezeginde 600-ge jýyq jup turǵanyn jazǵan edik.
