«Ańsaǵan sábı»: SQO-da tórt jylda 200-ge jýyq náreste dúnıege keldi

PETROPAVL. KAZINFORM – Soltústik Qazaqstan oblysynda 200 otbasy bedeýlikpen tirkeýge alynǵan.

SQO-nyń shtattan tys akýsher-gınekology Elena Kalıýjnaıanyń aıtýynsha, 12-19 mamyry aralyǵynda QR Áıelder isteri jáne otbasylyq-demografııalyq saıasat jónindegi Ulttyq komıssııanyń bastamasymen ekinshi jyl qatarynan halyqtyń reprodýktıvti densaýlyǵyn qorǵaýǵa arnalǵan aptalyq ótkizilip jatyr.

Bul aptalyqtyń ótkizilýine basty sebep — jasóspirimder arasynda jynystyq ómirdiń erte bastalýyna jáne saldarynan týyndaıtyn qaýipterge, josparlanbaǵan júktiliktiń aldyn alý joldaryna jurttyń nazaryn aýdarý jáne jynystyq jolmen beriletin ınfektsııalar týraly habardar etý.

- SQO-da 120 myń fertıldi jastaǵy áıel turady. Onyń ishinde aýyr ekstragenıtaldy patologııamen esepte turǵan áıelder sany – 1390. Al jasóspirim qyzdar sany – 28 239.

Qazirgi ýaqytta oblysta 2 256 júkti áıel esepke alynǵan, olardyń 52% – qaýip tobynda tur.

Áıelderdiń 20% ekstragenıtaldy aýrýlar anyqtalǵan, olar: gıpertonııa, anemııa, pıelonefrıt, varıkoz, júrek aýrýlary. 8 áıelge júktilikti saqtaý medıtsınalyq turǵydan qarsy kórsetilgen – olar únemi bizdiń baqylaýymyzda, respýblıkalyq ortalyqta bosanatyn bolady, - deıdi Elena Kalıýjnaıa. 

Oblysta bedeýlik dıagnozy qoıylǵan 200 erli-zaıypty esepke alynǵan. Óńirde tórt jyldan beri «Ańsaǵan sábı» baǵdarlamasy júzege asyrylyp keledi. 

- Osy aralyqta SQO-ǵa memlekettik baǵdarlama aıasynda 777 kvota berildi. Nátıjesinde 193 náreste dúnıe esigin ashty. Olardyń otyzy – egizder, - deıdi akýsher-gınekolog.

Mamannyń aıtýynsha, halyqtyń reprodýktıvti densaýlyǵyn qorǵaýǵa arnalǵan aptalyq aıasynda turǵyndar oblystyń emhanalarynda tekseristen óte alady. 

Buǵan deıin SQO-da 23 myńnan astam áıel pregravıdaldy daıyndyqtan ótetindigin jazǵan edik.