«Ańsaǵan sábı»: Pavlodarda EKO kezeginde 600-ge jýyq jup tur
PAVLODAR. KAZINFORM – Óńirge erli-zaıyptylardyń ekstrakorporaldy uryqtandyrýdan ótýi úshin barlyǵy 250 kvota bólingen. Mamandar EKO – sábıli bolýǵa kómek kórsetýdiń sońǵy kezeńi ekenin aıtady.
Eldegi demografııalyq jaǵdaıdy jaqsartýǵa jáne bedeýlik máselesine tap bolǵan juptardy qoldaýǵa baǵyttalǵan «Ańsaǵan sábı» jobasy 2021 jyly iske qosyldy. Sol ýaqyttan beri Pavlodar oblysyna 1622 kvota bólingen.
– Bıyl aımaqqa barlyǵy 250 kvota bólindi. Kvota alý úshin azamattar MÁMS júıesinde mindetti túrde saqtandyrylǵan bolýy qajet. Erli-zaıyptylar turǵylyqty jeri boıynsha emhanaǵa júginip, reprodýktolog pen ýrologtyń qabyldaýyna barýǵa tıis. Er adam da, áıel de bastapqy taldaýlardy tapsyrýy kerek. Eger jup talaptarǵa saı kelse jáne olarda qarsy kórsetilimder bolmasa, kvotany MÁMS aıasynda ala alady, – deıdi oblystyq densaýlyqty saqtaý jáne otbasyn josparlaý ortalyǵynyń reprodýktologi Alma Katpına.
Búgingi tańda óńirde EKO kezeginde 600-ge jýyq jup tur. Mamandardyń aıtýynsha, adamdardyń kóbi reprodýktologqa kesh júginedi, osylaısha bedeýlikti emdeý protsesin sozyp alady. Dárigerler ekstrakorporaldy uryqtandyrýdy kómek kórsetýdiń sońǵy kezeńi dep ataıdy.
Eske sala keteıik, Qazaqstanda egizder sany artyp, shala týǵan sábıler úlesi azaıǵan.
