«Ańsaǵan sábı»: Qazaqstanda 15 myńǵa jýyq bala dúnıege keldi
ASTANA. KAZINFORM — Qazaqstanda «Ańsaǵan sábı» baǵdarlamasynyń arqasynda 15 myńǵa jýyq bala dúnıege keldi. 2021 jyldan beri baǵdarlama sheńberinde EKU-nyń 37 myńǵa jýyq tsıkli júrgizilip, jyl saıyn bólinetin kvotanyń sany 7 myńǵa deıin ulǵaıtyldy. Bul týraly Densaýlyq saqtaý mınıstrligi málim etti.
Mınıstrliktiń dereginshe, Qazaqstanda zamanaýı reprodýktıvtik tehnologııalardyń qoljetimdiligi kezeń-kezeńimen keńeıtilip keledi. Búginde otbasylardyń shamamen 15%-y bedeýlik máselesine tap bolady. Jyl saıte medıtsınalyq kómekke shamamen 20,5 myń erli-zaıypty júginedi.
«Ańsaǵan sábı» baǵdarlamasy Memleket basshysy Qasym-Jomart Toqaevtyń tapsyrmasy boıynsha 2021 jyly iske qosyldy. Baǵdarlama qosalqy reprodýktıvtik tehnologııalarǵa muqtaj otbasylarǵa kórsetiletin memlekettik qoldaýdy edáýir keńeıtýge múmkindik berdi.
Sonymen qatar reprodýktıvtik medıtsına jelisi de damyp keledi. Eger 2004 jyly EKU-ny tórt klınıka júrgizse, 2025 jyly olardyń sany 32-ge jetti. Osy kezeńde qosalqy reprodýktıvtik tehnologııalar tsıklderiniń sany segiz eseden astam ósip, jylyna 18,6 myńǵa jetti.
— Prenataldyq dıagnostıka baǵytynda da oń dınamıka baıqalady. 2026 jyldyń birinshi jartyjyldyǵynda ýltradybystyq zertteý kezinde týa bitken damý kemistikterin anyqtaý kórsetkishi 13,8%-ǵa artty. Al týa bitken kemistiktermen jáne hromosomalyq buzylystarmen dúnıege kelgen balalardyń sany 25,6%-ǵa tómendedi, — delingen habarlamada.
Alty aıdyń ishinde «Bir kúndik klınıka» sheńberinde shamamen 66 myń júkti áıel alǵashqy skrınıngten ótti. Mundaı format qaýip-qaterlerdi der kezinde anyqtaýǵa jáne qajet bolǵan jaǵdaıda bolashaq analardy qosymsha tekserýlerge jiberýge múmkindik beredi.
Densaýlyq saqtaý mınıstrligi reprodýktıvtik kómektiń qoljetimdiligin odan ári keńeıtip, erte dıagnostıkany jetildirý jumystaryn jalǵastyrady. Bul zamanaýı medıtsınalyq tehnologııalardyń elimizdiń barlyq óńirlerindegi otbasylarǵa qoljetimdi bolýyn qamtamasyz etýge baǵyttalǵan.
Aıta keteıik, Túrkistan oblysynda «Ańsaǵan sábı» baǵdarlamasy aıasynda keıingi bes jylda ekstrakorporaldy uryqtandyrý (EKU) nátıjesinde 1 myńǵa jýyq sábı dúnıege keldi.
