«Ańsaǵan sábı»: Byltyr EKO-men 2,4 myńnan astam sábı dúnıege keldi

ASTANA. QazAqparat - «Ańsaǵan sábı» memlekettik baǵdarlamasy aıasynda byltyr jasandy uryqtandyrý jolymen 2,4 myńnan astam sábı dúnıege keldi, dep habarlaıdy QazAqparat.

Densaýlyq saqtaý mınıstrliginiń málimetinshe, «Ańsaǵan sábı» arnaıy baǵdarlamasy aıasynda jyl saıyn ekstrakorporaldy uryqtandyrý (EKU) júrgizýge 7 000 kvota bólinedi. Sonyń nátıjesinde 2021 jyly 3 249 áıel júktilik boıynsha esepke alyndy, 2 097 otbasynda kópten kútken 2 461 bala dúnıege keldi. Onyń ishinde 1 288 qyz jáne 1 172 ul. Kópuryqty júktilikten 364 bala jaryq dúnıe esigin ashty.
Esterińizge sala keteıik, 2020 jyldyń 1 qyrkúıeginde Memleket basshysy halyqqa Joldaýynda 2021 jyldan bastap EKU-ǵa kvotalardy 7 esege ulǵaıta otyryp iske qosýdy tapsyrǵan bolatyn, oǵan respýblıkalyq bıýdjetten 6 mlrd teńgeden astam qarjy bólindi.
Prezıdent tapsyrmasyna oraı:

- jetekshi mamandandyrylǵan mamandar men densaýlyq saqtaýdy uıymdastyrýshylar arasynan Saraptamalyq keńes quryldy;
- «Ańsaǵan sábı» arnaıy baǵdarlamasy bekitildi, ony iske asyrý sheńberinde KRT boıynsha normatıvtik-quqyqtyq aktiler qaıta qaraldy;
- óńirler bólinisinde bedeýligi bar patsıentterdiń (áıelder men erler) tizimderi ózektendirildi;
- urpaqty bolý jasyndaǵy áıelder men erlerdiń sanyn eskere otyryp, óńirler boıynsha 7000 EKU tsıkli bólindi;
- Áleýmettik medıtsınalyq saqtandyrý qory (ÁMSQ) medıtsınalyq uıymdar bólinisinde EKU qyzmetteriniń kólemin ornalastyrdy. MÁMS júıesinde EKU ótkizý boıynsha qyzmetterdi búginde 19 klınıka usynady (onyń 3-i memlekettik, 16-sy jeke medıtsınalyq uıymdar).