«Ańsaǵan sábı»: Bıyl SQO-ǵa 203 kvota bólindi

PETROPAVL. QazAqparat – Soltústik Qazaqstan oblysyna «Ańsaǵan sábı» baǵdarlamasy boıynsha byltyr 217 kvota bólinse, sonyń jartysy oń nátıjesin berdi, dep habarlaıdy QazAqparat tilshisi.

Óńirlik kommýnıkatsııalar qyzmetinde «MÁMS: 2022 jyldyń ózekti máseleleri» atty baspasóz máslıhaty ótti. Jıynda qordyń ótken jyly atqarǵan jumysy qorytyndylanyp, bıylǵy josparlary belgili boldy. «Áleýmettik medıtsınalyq saqtandyrý qory» KEAQ SQOF málimetinshe, byltyr konsýltatsııalyq-dıagnostıkalyq kómek kórsetý 1,3 esege ulǵaıǵan.

«Onyń ishinde qymbat turatyn KT, MRT qyzmetterin turǵyndar 23 671 ret paıdalandy, bul 2020 jylǵa qaraǵanda 3,5 ese kóp. Osylaısha halyq ortasha alǵanda 473 mln teńgesin únemdeı aldy. 3360 syrqat medıtsınalyq ońaltýdan ótti. Joǵary tehnologııalardy paıdalana otyryp, 23 operatsııa jasaldy, onyń 16-sy kardıohırýrgııalyq ota. Bir operatsııanyń ortasha quny – 3 656 080 teńge», - deıdi fılıaldyń bólim basshysy Qarlyǵash Іlııasova.

«Ańsaǵan sábı» arnaıy baǵdarlamasy boıynsha byltyr 217 kvota bólindi, oǵan 213 áıel qatysyp, 108-ine ana bolý baqyty buıyrdy. Bıyl óńirge osy baǵdarlama boıynsha 203 kvota berildi.

«Baǵdarlamaǵa qatysý úshin turǵylyqty jeri boıynsha emhanaǵa baryp, barlyq tekserýden ótý qajet. Olardyń nátıjesimen perınataldyq ortalyqqa reprodýktolog-dárigerge qaralady. EKU protsedýrasy júrgiziletin klınıkany erli-zaıypty erikti túrde tańdaıdy. Búgingi tańda Qazaqstanda 24 reprodýktıvti medıtsına ortalyǵy jumys isteıdi», - deıdi Qarlyǵash Іlııasova.

MÁMS-qa qatysqan jeke medıtsınalyq klınıkalardyń sany artyp keledi. SQO boıynsha bıyl 41 medıtsınalyq mekeme qyzmet kórsetse, sonyń 16-sy – jekemenshik.