«Ańsaǵan sábı» baǵdarlamasy arqyly 8 myń náreste dúnıege keldi

ASTANA. KAZINFORM – Bul týraly QR DSM Ana men bala densaýlyǵyn qorǵaý departamentiniń dırektory Maǵrıpa Embergenova Ortalyq kommýnıkatsııalar qyzmetinde habarlady.

«Demografııalyq jaǵdaıdy jaqsartý maqsatynda Memleket basshysynyń tapsyrmasymen 2021 jyldan bastap Qazaqstanda «Ańsaǵan sábı» baǵdarlamasy júzege asyrylyp keledi, sonyń aıasynda 8 myńǵa jýyq kópten kútken balalar dúnıege keldi», - dedi M. Embergenova.

Onyń aıtýynsha, áıelderdiń densaýlyǵyn nyǵaıtý jáne kásibı tekserýlermen, aldyn-ala daıyndyqpen jáne kontratseptsııamen qamtýdy arttyrý úshin «Analar saýlyǵy» baǵdarlamasy da júzege asyrylýda.

«Sondaı-aq, Qazaqstanda alǵash ret júktilikke pregravıdarlyq daıyndyq boıynsha halyqaralyq usynystar eskerilgen klınıkalyq hattama bekitildi», — dep atap ótti spıker.

Elimizdegi 240 bosaný statsıonarynda júkti jáne bosanǵan áıelderge medıtsınalyq kómek kórsetiledi, onda 9 myńnan astam tósek-oryn bar, onyń 43%-y aýyldyq jerlerde áıelderdi qabyldaıdy.

Buǵan deıin M. Embergenova aýylǵa baratyn dárigerler memleketten qandaı tólemder alatynyn túsindirgen edi.