«Ańsaǵan sábı» baǵdarlamasy arqyly 10 myńnan astam náreste dúnıege keldi

ALMATY. KAZINFORM – Prezıdent 2021 jyly bastamashylyq etken «Ańsaǵan sábı» baǵdarlamasy nátıjesinde elde tórt jylda 10000-nan astam sábı dúnıege keldi.

сәби
Фото: gov.kz

Bul týraly óńirlik kommýnıkatsııalar qyzmetinde ótken baspasóz máslıhatynda «Ekomed» klınıkasy men halyqaralyq «New Generation Clinic» (NGC) ortalyǵynyń dırektory Marat Otarbaev málimdedi.

Embrıologtyń aıtýynsha, qazir elde EKO jasaıtyn 30 klınıka bar. Onyń basym bóligi mindetti áleýmettik medıtsınalyq saqtandyrý (MÁMS) júıesine qatysady.

– 2021 jyly Memleket basshysynyń tapsyrmasymen «Ańsaǵan sábı» baǵdarlamasy iske qosyldy. Keıingi tórt jyl ishinde, ıaǵnı, osy baǵdarlama bastalǵannan beri respýblıka boıynsha 10 myńnan astam sábı jatyrdan tys uryqtandyrý arqyly dúnıege keldi,– deıdi ol.

Reprodýktolog Aıgerim Ahmetovanyń aıtýynsha, Almatyda 240-tan astam áıel EKO protsedýrasy arqasynda ana atandy.

– Sońǵy tórt jylda «Ańsaǵan Sábı» baǵdarlamasy aıasynda 28 myń EKO sharasy jasalyp, sonyń arqasynda 10 myńnan astam bala dúnıege keldi. Almatyda bul baǵdarlama 562 áıeldi qamtysa, onyń 246-sy ana atandy, – dedi reprodýktolog.

Spıkerlerdiń sózinshe, Qazaqstandaǵy erli-zaıyptylardyń 16-17%-y bala kóterýde qıyndyqtarǵa tap bolady.

– Qazir skrınıng baǵdarlamasyn engizý kerek. Óıtkeni, jastar arasynda aýrýdy jáne onyń týyndaýyna áser etetin faktorlardy erte anyqtaýǵa múmkindik beretin medıtsınalyq zertteýler jıyntyǵy joq. Jas qyz- jigitter ózderiniń reprodýktıvtik potentsıalyn bilmeıdi. Máselen, ata-ana atanǵysy keletin juptar túrli dárigerlerge, halyq emshilerine baryp, eshqandaı nátıjıe shyqpaǵanan keıin EKO tehnologııasyna júginedi. Osy ýaqyt ishinde olar biraz ýaqytty joǵaltady. Ekstrakorporaldy uryqtandyrý protsedýrasynyń ózindik talaptary bolady,–dep atap ótti Marat Otarbaev.

Eske salaıyq, buǵan deıin «Ańsaǵan sábı» baǵdarlamasy 2030 jylǵa deıin jalǵasatyny týraly jazǵan bolatynbyz.

 

Сейчас читают