«Ańsaǵan sábı» baǵdarlamasy 3 jylda 7 myń nárestege ómir syılady
ASTANA. KAZINFORM – Halyqaralyq balalardy qorǵaý kúninde Astanadaǵy «Ekomed» ortalyǵynda «Ańsaǵan səbı» baǵdarlamasynyń 3 jyldaǵy jumysyn qorytyndylaǵan erekshe festıval ótti.
Atalmysh is-sharaǵa elimizdiń ár aımaǵynan elordadaǵy mamandarǵa perzent súıý maqsatymen kelip, degenine jetken 100-den astam ata-ana bir-birimen qaýyshyp, kókeıdegi qýanyshyn kóppen bólisti.
Merekelik keshte Qazaqstanda deneden tys uryqtandyrý zerthanasynyń negizin qalaǵan Saltanat Baıqoshqarova, Densaýlyq saqtaý mınıstri Aqmaral Álnazarova sóz sóılep, balalar men ata-analardy merekemen quttyqtady.
«Bul jerge 2020 jyldan beri iske asyryla bastaǵan «Ańsaǵan sábı» baǵdarlamasynyń mol nátıjesiniń bir bóligin ǵana kórýge keldik. Keıingi úsh jyldyń ishinde, ıaǵnı, osy baǵdarlama bastalǵannan beri respýblıka boıynsha 7 myńnan astam sábı jatyrdan tys uryqtandyrý arqyly dúnıege keldi. Oǵan deıin bıýdjetten mundaı tásilmen urpaq súıgisi keletinderge 1000 kvota berilip kelse, Prezıdent tapsyrmasymen kvota sany 7 ese arttyrylǵanyn bilesizder. Ol kezde kezek kútetin ata-analardyń sany kóp bolatyn. Kezek ýaqyty 7-8 jylǵa deıin sozylatyn. Qazir jyl saıyn 7 myń kvota bólinip otyrǵandyqtan kezek merzimi 12 aıǵa deıin qysqaryp otyr. Bul halyqaralyq mejemen alǵannyń ózinde jaqsy kórsetkish», - dedi mınıstr BAQ ókilderine bergen suhbatynda.
Sondaı-aq ol «Ańsaǵan sábı» baǵdarlamasynyń tıimdiligi de halyqaralyq mejeniń eń jaqsy degen kórsetkishterine saı ekenin aıtady.
«Men aıtqan úsh jylda 21 myń kvota berilse, sonyń ishinde 7 myń kvota jemisin berip, deni saý balany ómirge ákelgen. Bul da halyqaralyq kórsetkishtermen salystyrsaq áldeqaıda jaqsy kórsetkish. «Ekomed» ortalyǵynyń mamandary, reprodýktolog ǵalymdar, ata-analar «Ańsaǵan sábı» baǵdarlamasynyń tıimdiligin aıtyp, birqatar usynysyn jetkizdik. Onyń kóbi tarıf kólemi men qunyna baılanysty. Bárin mamandarmen aqyldasa otyryp sheshýge bolady dep esepteımin. Prezıdent Qasym-Jomart Toqaevtyń tapsyrmasymen qolǵa alǵan bul baǵdarlamanyń qoljetimdiligin halyq ta sezip otyr. Mamandar da jetkilikti. Osy másele boıynsha Ortalyq Azııada kóshbasshyǵa aınaldyq. Shetelden kelip jatqan qonaqtar da az emes», - dedi Aqmaral Álnazarova.
Festıvalden keıin mınıstr A.Álnazarova men «Ekomed» klınıkalar tobynyń Astanadaǵy ortalyǵynyń medıtsınalyq dırektory Almaz Ibragımov «Ańsaǵan sábı» aıasynda ómirge kelgen eki balanyń tusaýyn kesti.
