«Ańsaǵan sábı»: Atyraý oblysynda bıyl EKU-ǵa 233 kvota bólingen
Buǵan deıin Atyraýda 52 jastaǵy áıel tuńǵysh sábıin bosanǵanyn jazǵan bolatynbyz.
Tuńǵyshyn ómirge ákelgen Aıgúl Bısenbaeva Jylyoı aýdanynyń ortalyǵy – Qulsary qalasynda 90-jaldardan beri turady. Eki jyl buryn turmysqa shyqqan.
«Ózim Atyraý qalasyna taıaý ornalasqan Tomarly aýylynda dúnıege kelgen edim. Ózim – egizdiń syńarymyn. Keıin 90-jyldary Qulsary qalasyna qonys aýdardym. Kúıeýim Ibragımmen eki jyl buryn tanysyp, ekeýmiz otbasyn qurdyq. Onyń burynǵy otbasynan uly men qyzy, nemere-jıenderi bar. Bárimiz bir shańyraqta tatý turamyz», -deıdi Aıgúl Bısenbaeva.
Onyń negizgi mamandyǵy – aspaz. «Mangıstaý Servıs Kompanı» JShS-de jumys istegen. Júktiligine baılanysty jumysynan shyǵyp ketken.
«Turmysqa shyqqan soń balaly bolýdy oılana bastadym. Óıtkeni, otbasynyń baqyty – bala tárbıeleý. Biraq, «bul meniń jasymda múmkin be?» degen kúdigim de bolǵanyn jasyrmaımyn. Sol sebepten, qulsarylyq dárigerler Rýslan Ákenov pen Nurshat Qalıeva, Atyraýda gınekolog Gúlsara Basarovanyń keńesine júgindim. Dárigerlerdiń keńesimen EKU arqyly bala kóterdim. Oblystyq perınataldyq ortalyqtyń bilikti dárigeri Dınara Maratqyzy ota jasady. Bári sátti bolyp, ómirge deni saý ul ákeldim. Esimin Nurgeldi dep atadyq», -deıdi Aıgúl Bısenbaeva.
Oblystyq densaýlyq saqtaý basqarmasy baspasóz qyzmetiniń málimetinshe, EKU-men sábı súıgisi keletin analarǵa bólinetin kvota sany kóbeıgen. Máselen, 2018 jyly – 29, 2019 jyly – 30, al, 2020 jyly analarǵa 37 kvota berilgen.
«Ár otbasy úshin sábıdiń dúnıege kelýi – sheksiz baqyt. Alaıda, otbasynyń bári birdeı bul qýanyshqa bólene almaıdy. Degenmen, EKU tásilimen sábıli bolý múmkindigi bar. Osy oraıda memleket tarapynan jyl saıyn ekstrakorporaldy uryqtandyrý protsedýrasyna bólinetin kvota kóbeıip keledi. Byltyr Atyraý oblysynda turatyn analarǵa ekstrakorparaldy uryqtandyrý (EKU) úshin «Ańsaǵan sábı» baǵdarlamasymen 232 kvota bólingen edi. Bul kvota tolyq ıgerildi. Al, atalǵan jobamen sábı súıýdi ańsap júrgen analarǵa 233 kvota bólinip otyr. Óıtkeni, bizdiń oblysta da bedeýlik dıagnozymen tirkelgen áıelder sany azaıar emes. Qazir osyndaı 840 áıel tirkeýde tur», -deıdi reprodýktolog-dáriger Gúlnar Esqaıyrova.