«Ańsaǵan sábı» arqyly 30 myń áıelge tegin EKO jasaldy

ASTANA. KAZINFORM — 2021 jyldan beri «Ańsaǵan sábı» baǵdarlamasy aıasynda 30 myńnan astam áıelge EKO jasalyp, kópten kútken 10 myń sábı dúnıege keldi.

Bul týraly QR DSM Ana men bala densaýlyǵyn qorǵaý departamentiniń dırektory Maǵrıpa Embergenova aıtyp berdi.

— Mindetti áleýmettik medıtsınalyq saqtandyrý júıesi arqyly «Ańsaǵan sábı» baǵdarlamasy aıasynda 2021 jyldan beri 30 myńnan astam áıelge EKO jasaldy. Shamamen 10 myń sábı dúnıege keldi. Al jasóspirimder arasyndaǵy bosaný kórsetkishi 8 paıyzǵa, túsik jasaý jaǵdaılary — 13 paıyzǵa azaıdy, — dedi Maǵrıpa Embergenova Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, aýrýdyń aldyn alý, syrqattanýdy boldyrmaý jáne bala kótere alatyn jastaǵy áıelderdiń densaýlyǵyn jaqsartýǵa baǵyttalǵan sharalar qolǵa alynǵan. 

— Osy maqsatta Densaýlyq saqtaý mınıstrligi «Analar saýlyǵy» baǵdarlamasyn júzege asyrýdy bastady. Bul áıelderdiń densaýlyǵyn baqylaý, tekserý jáne júktilikke deıingi densaýlyǵyn nyǵaıtýǵa baǵyttalǵan baǵdarlama. Júktilikke deıingi daıyndyqpen qamtý kórsetkishi 23 paıyzǵa deıin artty. Anemııa, pıelonefrıt, qant dıabeti jáne arterııalyq gıpertenzııasy bar júkti áıelder 2024 jyldan bastap qajetti preparattarmen tegin qamtamasyz etilip keledi, — dedi ol.

Sonymen birge, akýsherlik salasynda emdeýdiń ınnovatsııalyq ádisteri engizilip jatyr. Bosaný qyzmetteriniń tarıfi 40 paıyzǵa deıin artqan. 

Aıta keteıik, Qazaqstanda ana ólim-jitimi azaıdy. Elimizde bala týatyn jastaǵy 4,8 mıllıon áıel bar.