«Ańsaǵan sábı»: Aqtóbede 26 egiz ben bir úshem ómirge keldi

AQTÓBE. KAZINFORM — Baǵdarlama aıasynda 4 jylda 1527 jupqa kvota berilip, 448 bala ómirge keldi. 

Aqtóbede «Ańsaǵan sábı» baǵdarlamasy aıasynda kvota bólý jumysy jalǵasyp jatyr. 2021 jyldan beri 1527 jupqa memlekettik kvota bólindi. Onyń ishinde 269-y bıyl berildi.

— Baǵdarama aıasynda patsıentter elimizdegi 19 ortalyqta ekstrokorporaldi uryqtandyrý júrgizdi. Onyń ishinde otbasylyq juptyń 37% Aqtóbedegi perınataldyq ortalyqty tańdady. Búginde 448 sábı ómirge keldi. Olardyń arasynda 26 egiz, bir úshem bar. Sonymen birge qazir 71 áıel júkti. Keler jylǵa 311 kvota bólinip otyr, — dedi Aqtóbe oblysynyń densaýlyq saqtaý basqarmasy basshysynyń orynbasary Aıgúl Amanjolova.

Aqtóbedegi ekstrokorporaldi uryqtandyrý ortalyǵy 2017 jyldan beri jumys istep tur. Ortalyqta ómirge kelgen sábılerdiń alǵashqy legi byltyr mektep tabandyryǵyn attady.

— Buryn sábı súıgisi keletin juptar úshin tek 45-50 kvota berildi. Ol kezde erli-zaıyptylar úsh jyl boıy kútetin edi. Qazir birneshe júz kvota bólinip tur. Kútý kezegi de azaıdy. Ol úshin aldymen ýchaskelik dárigerge qaralyp, daıyndyq júrgizedi. Bul kezde juptardyń jas erekshiligi mańyzdy. Ortasha jasy 33-34 bolsa, 35-40 paıyzy bala súıý baqytyna keneledi. Al ortasha jasy 35-36 bolsa, 33 paıyzdan tómen bolady. Qazirgi kezde 1400 áıel dısperserlik esepte tur, — dedi Aqtóbe oblysynyń bas reprodýktolog dárigeri Svetlana Esenamanova.

Buǵan deıin habarlaǵanymyzdaı, 2021 jyldan beri «Ańsaǵan sábı» baǵdarlamasy aıasynda 30 myńnan astam áıelge EKO jasalyp, kópten kútken 10 myń sábı dúnıege keldi.