Ańsaǵan Mustafa Qytaıdaǵy qandastarymyzǵa sheberlik synybyn ótkizbekshi
«Іshki Qytaıda Morı degen jer bar eken. Sol jerde 6 000 qazaq turady eken. Sol jerdegi qazaqtar menimen kezdeskisi kelip, master-klass ótkizýdi surap shaqyrdy», dep jazady elordalyq sýretshi Feısbýktegi paraqshasynda.
Áleýmettik jelilerde Ańsaǵan Mustafanyń ár jańalyqqa, kóterilgen problemalarǵa arnap salynǵan sýrettermen qatar, kóbine óz sýretteri arqyly qalyń oqyrmannyń nazaryn jańa taqyrypqa aýdaryp, tyń máselelerdiń basyn qozǵap keledi. Onyń qazaq jastaryna arnap salynǵan sýretteri túrik, japon, grýzın, qyrǵyz, aǵylshyn, orys jáne taǵy da basqa onshaqty tilderge aýdarylyp, álemge tarady.
«Qytaıǵa sýretterimdi ótkize me eken? Jalpy oılap edim, kórme Almaty , Astana , Taldyqorǵan, Shymkent, Taraz, Atyraý, Temirtaý, Qyzylordada ótti ǵoı. Endi týǵan jerim Oraldan shaqyrsa, aýylymnyń bir aqsaqaly shaly batasyn berse, Ázerbaıjanǵa tartyp ketsem dep júrmin. Endi buıyrsa shet elge baramyn», - dep jazdy sýretshi.
Jazbaǵa pikir qaldyrǵan Qytaıdan kelgen qandasymyz jýrnalıst Ularbek Dáleıuly: « Morı ishki Qytaıda emes, Úrimjige (qalasyna) jaqyn jer. Negizinen qazaqtar qonystanǵan. Qazaqy qolónermen, kestemen dańqy shyqqan jer. Qoryqpaı baryp qaıtsańyz bolady», dep pikir bildirdi.
