Ańsaǵan Qojanasyp Mońǵolııada toǵyzqumalaqtan Azııa chempıony atandy
ASTANA. QazAqparat - Toǵyzqumalaqtan Mońǵolııada ótken Azııa chempıonatynda Qaraǵandy oblysynyń týmasy birinshi oryndy jeńip aldy, dep habarlaıdy QazAqparat sports.kz-ke silteme jasap.
Qaraǵandy oblystyq dene shynyqtyrý jáne sport basqarmasy basshysynyń orynbasary Rústem Qojabekovtiń aıtýynsha, óńirde toǵyzqumalaq jan-jaqty damyp keledi. «Mońǵolııadaǵy jarysqa 8 elden 250-den astam sportshy qatysty. Oblys namysyn Ańsaǵan Qojanasyp qorǵady. Bizdiń oblysta sporttyń osy túrinen respýblıkalyq jarystardyń jeńimpazdary bar, endi olardyń qataryna Azııa chempıony da qosyldy», - deıdi ol.
Ańsaǵan qazir 17 jasta, toǵyzqumalaqpen aınalysyp jatqanyna 8 jyldan asty. «Men sporttyń basqa túrimen aınalysqan emespin, maǵan toǵyzqumalaq unaıdy, ol logıkany damytady», - deıdi Ańsaǵan.
Aıta keteıik, 6 tamyz kúni Qaraǵandyda toǵyzqumalaqtan Qazaqstan chempıonaty ótedi.
