Anonymous hakerleri álemdi alańdatyp otyr
ASTANA. 2 naýryz. QazAqparat - Jýyrda atyshýly Anonymous hakerler júıesiniń 25 belsendisi Interpoldyń qolyna túsken bolatyn. Ol týraly Ýtro.rý saıty jazdy.
Al keshe sol uıymnyń músheleri ıspan tildi blogtarynda bolǵan oqıǵaǵa baılanysty óz oılaryn aıtyp, málimdeme jasady.
Onda Interpol men ıspan tildi elderdiń polıtsııasy júrgizgen operatsııany synǵa alǵan hakerler «bizdiń júıe gıdra sııaqty, bir basyn shapsań, ornyna myń bas ósip shyǵady. Sizder Anonymous-tyń berik irgetasyn eshqashan shaıqalta almaısyzdar», - dep málimdedi.
«Úkimettikter bizden qorqady. Olar Anonymous sııaqty ıdeıamen qalaı kúresý kerektigin elestete de almaıdy» - deı kele, - «Biz ózimizdiń ǵalamtordaǵy sóz bostandyǵy úshin bolyp jatqan úlken soǵystyń qaq ortasynda qalǵanymyzdy moıyndaımyz. Ol soǵystyń qaıǵy-qasiretsiz, muń-nalasyz bitpeıtinin de bilemiz», - deıdi taǵy da.
Anonymous hakerlik tobynyń belsendilerin quryqtaý operatsııasy muhıttyń eki jaǵyndaǵy ıspan tildi elderde 29 aqpan kúni júrgizilgen bolatyn. Sol kúni Chılı, Argentına, Kolýmbııa jáne Ispanııanyń polıtseıleri Interpoldyń basshylyǵymen 17 jáne 40 jas aralyǵyndaǵy 25 hakerdi tutqyndaǵan. Ustalǵandardan 250-ge jýyq júıelik jáne mobıldik qurylǵylar tárkilengen.
Alaıda Anonymous ta qarap qalmady. Sol kúni keshke olar Interpol saıtyn buzyp, astan-kesteńin shyǵardy.
Resmı derekter boıynsha, hakerlerdi jappaı ustaýǵa Kolýmbııa men Chılı úkimetteriniń saıttaryna jasalǵan kıbershabýyldar sebep bolǵan. Naqtyraq aıtsaq, budan sál buryn anonımdikter Kolýmbııa prezıdenti men Qorǵanys mınıstrliginiń, Chılıdiń ulttyq kitaphanasynyń jáne Endesa elektr-energetıkalyq kompanııasynyń saıttaryn buzyp kirgen bolatyn.
Alaıda Anonymous-tardyń sońǵy jyldardaǵy eń ataqty shabýyly dep amerıkandyq Stratfor saraptamalyq kompanııasynyń saıtyn buzǵanyn aıtýǵa bolady. Sol joly olar Ortalyq barlaý basqarmasynyń (TsRÝ) 200 gıgabaıttyq aqparatyn urlap alyp, halyqaralyq saıasattaǵy bylyq-shylyqty álemge jaıýmen aınalysatyn atyshýly WikiLeaks saıtyna bergen edi.
Anonymous sońǵy jyldary WikiLeaks-ke bóget bolatyn uıymdardyń saıtyna shabýyldar jasap, biraz bedel jınap aldy. Anonymous-tyń atynan «komandır Iks» degen búrkenshik esimmen bir adam ǵana «jaryq álemge» shyǵady. Túrli BAQ-tardyń alyp-qashpa áńgimeleri boıynsha, ol San-Frantsıskoda baǵban bolyp jumys isteıdi. Al qoly qalt etkende saıttardy buzýmen aınalysady eken.
Atalmysh toptyń birneshe joıqyn kıbershabýyly belgili. 2010 jyldyń jeltoqsanynda olar Visa, Mastercard jáne PayPal sııaqty iri tólem júıeleriniń saıttaryn «san soqtyrǵan». Odan keıin Apple men Sony-dyń, qalaberdi kóptegen elderdiń polıtsııa vedomstvolarynyń serverlerin «sylqıtyp» ketken. Al bıyl FBB, OBB, Aq úıdiń saıttaryn buzǵan. Anonymous quramynda kóptegen elderdiń hakerleri bar, alaıda olar belgili bir qurylymǵa baǵynbaıdy.
