Anonımdi paraqshalar Mańǵystaý oqıǵasy týraly neni burmalap taratyp jatyr
ASTANA. KAZINFORM — Memleket qabyldanyp jatqan barlyq sharalar týraly áleýmettik jelilerde jedel ári tolyq aqparat berip otyrǵanyna qaramastan, áleýmettik jelilerde Mańǵystaýdaǵy oqıǵaǵa qatysy joq buryn túsirilgen beınematerıaldar taratylyp, JI kómegimen ázirlengen kontent jarııalanyp jatyr. Bul týraly Jalǵan aqparatqa qarsy is-qımyl ortalyǵy habarlady.
Sonymen qatar, áskerı qyzmetshilerdiń qaza bolýy men olardyń jaqyndarynyń qaıǵysyn paıdalana otyryp, negizsiz boljamdar men alyp-qashpa pikirler taralyp jatyr.
Ortalyq sondaı-aq úılestirilgen áreketterdiń belgileri baıqalatyn, onyń ishinde anonımdi akkaýnttar arqyly taralatyn habarlamalardy tirkeýdi jalǵastyryp jatyr.
Ásirese jaqynda ǵana qurylǵan anonımdi paraqshalardyń belsendiligi baıqalady. Olar is júzinde birden qaıǵyly oqıǵa taqyrybyn taratýǵa kirisip, jańa talqylaý taqyryptaryn qalyptastyryp, qaýesetterdi kóbeıtip, boljamdardy kópshilikke belgili «faktiler» retinde usynyp jatyr.
Tómende osyndaı aqparattyq manıpýlıatsııalarǵa tán birneshe mysal keltiriledi.
Feık: «Qaza bolǵandardyń naqty sany jasyrylyp otyr»
Shyn máninde, izdestirý-qutqarý jumystary barysynda resmı derekter naqtylanyp otyrdy. Qorytyndy aqparat jarııalandy: 14 áskerı qyzmetshi qaza tapty.
Feık: «Áskerı qyzmetshiler tikushaqtan desanttaldy».
Jarııalanǵan tergeý derekterine sáıkes, áskerı qyzmetshiler katerdi paıdalana otyryp tapsyrma oryndaǵan. Oqý-jattyǵýdy uıymdastyrý mán-jaılary, qaýipsizdik talaptarynyń saqtalýy jáne jaýapty tulǵalardyń áreketteri tergeý barysynda anyqtalyp jatyr.
Feık: «Komandır mas kúıinde bolǵan»
Bul málimdeme ásirese tsınızm men adamgershilikke jat sıpatymen erekshelenedi. Sóz bolyp otyrǵan komandır óz áskerı qyzmetshilerimen birge qaza tapty. Onyń alkogoldik masań kúıde bolǵanyn rastaıtyn qandaı da bir derek joq.
Feık: eski vıdeo qaza tapqan áskerı qyzmetshiniń múrdesin tasymaldaý retinde taratylyp jatyr.
Beınematerıaldy taldaý barysynda avtomobıl beınelengen rolıktiń qaıǵyly oqıǵaǵa deıin, tamyz aıynda jarııalanǵany anyqtaldy. Buryn túsirilgen beınejazbaǵa qoǵamdyq narazylyq týdyrý maqsatynda jańa emotsıonaldyq kontekst berilgen.
Feık: Kaspıı teńiziniń jaǵalaýynda qaraly kúnderi túsirilgen áserli qoıylym sıpatyndaǵy vıdeo.
Ashýly jazbalarmen birge taraǵan bul rolıkti kóptegen qoldanýshy Mańǵystaýda túsirilgen beıne dep qabyldaǵan. Shyn máninde, vıdeo Tanjer qalasynda (Marokko) túsirilgen. Avtordyń aıtýynsha, beınematerıal kezdeısoq Qazaqstannyń áleýmettik jeliler segmentine tarap ketken. Onyń ózi Qazaqstandaǵy oqıǵalardan habardar bolmaǵan.
Feık: Memleket «eshqandaı tergeý júrgizip jatqan joq».
Bul da faktilerge sáıkes kelmeıdi. Іzdestirý-qutqarý operatsııasy qaza bolǵan sońǵy áskerı qyzmetshiniń denesi tabylǵanǵa deıin jalǵasty. Memleket basshysynyń tapsyrmasy boıynsha Úkimettik komıssııa dereý quryldy. Qyzmetke salǵyrt qaraý jáne keme júrgizý qaǵıdalaryn buzý faktileri boıynsha qylmystyq is qozǵaldy.
Prezıdenttiń ókimimen Qorǵanys mınıstrligindegi jaǵdaıdy keshendi tekserý jónindegi jeke komıssııa quryldy. Komıssııa jeti kún merzimde jumysty uıymdastyrýǵa, áskerı bólimderdiń qarjylyq jáne materıaldyq-tehnıkalyq qamtamasyz etilýine baǵa berýi tıis.
Bul feıkterdiń barlyǵyna ortaq bir nárse bar: mundaı talqylaýlar kóptegen qoldanýshyny óz aqparattyq aǵynyna tartady.
QR QK 274-babynda kórineý jalǵan aqparat taratqany úshin qylmystyq jaýaptylyq kózdelgen. Mundaı aqparat onlaın-platformalardy paıdalana otyryp taratylǵan jaǵdaıda, jaza úsh jylǵa deıin bas bostandyǵynan aıyrýdy, al aýyr zardapqa ákep soqqan jaǵdaıda bes jylǵa deıin bas bostandyǵynan aıyrýdy kózdeýi múmkin.
Eske salaıyq, Kaspııdegi qaıǵyly oqıǵa 24 qyrkúıekte oqý-jaýyngerlik tapsyrmany oryndaý kezinde boldy. Aýa raıynyń kúrt nasharlap, jeldiń kúsheıýi saldarynan áskerı qyzmetshilerdi teńiz aǵyzyp áketti.
Buǵan deıin Memleket basshysy Qorǵanys mınıstrligindegi ahýaldy keshendi tekserý jónindegi komıssııa qurýdy tapsyrǵan bolatyn. Komıssııaǵa atqarylǵan jumystyń alǵashqy nátıjeleri týraly Prezıdentke jeti kún ishinde baıandaý tapsyryldy.
Búgin Prezıdent Dáýren Qosanovty Qazaqstannyń Qorǵanys mınıstri qyzmetinen bosatyp, bul laýazymǵa Aıdos Myrzahmetovti taǵaıyndady.
