Anonımdi narkologııalyq konsýltatsııa kabınetteri óńirlerde ashylady
ASTANA. KAZINFORM — Qazaqstan Respýblıkasy Densaýlyq saqtaý mınıstrligi narkologııalyq qyzmetti jańǵyrtýǵa kiristi. Bul jumys qaýipterdi erte anyqtaýǵa, olardyń aldyn alýǵa, anonımdi kómektiń qoljetimdiligin arttyrýǵa jáne qaýip toptarymen jumystyń tıimdiligin kúsheıtýge baǵyttalǵan. Bul týraly vedomstvonyń baspasóz qyzmeti málim etti.
Tıisti tapsyrmalar narkologııalyq kómekti damytý máseleleri jónindegi keńes qorytyndysy boıynsha berildi.
️Búginde negizgi máselelerdiń biri — azamattardyń mamandandyrylǵan kómekke tym kesh júginýi. Dıagnozdyń jarııa bolýy, dıspanserlik esepke qoıylý nemese áleýmettik saldarlarǵa qatysty alańdaýshylyq kóptegen adamnyń emdelýden bas tartýyna sebep bolyp otyr. Sonyń saldarynan olar bilikti medıtsınalyq kómeksiz qalyp nemese beıresmı ári baqylaýsyz qyzmet kórsetetin qurylymdarǵa júginedi.
Osyǵan baılanysty Densaýlyq saqtaý mınıstrligi elimizdiń barlyq óńirinde anonımdi narkologııalyq kómektiń qoljetimdiligi men sapasyn qamtamasyz etýdi mindet etip qoıdy. Vedomstvo basshysy Aqmaral Álnazarova 1 qyrkúıekke deıin mundaı kabınetter joq óńirlerde anonımdi narkologııalyq konsýltatsııa berý kabınetterin ashýdy jáne osyndaı kómekti kórsetýge qajetti ınfraqurylymdy qalyptastyrýdy tapsyrdy.
— Bizdiń mindetimiz — árbir adamnyń aıyptaýdan nemese jeke málimetteriniń jarııa bolyp ketýinen qoryqpaı, der kezinde kómekke júgine alatyn jaǵdaı jasaý. Táýeldilik — kásibı medıtsınalyq kómekti qajet etetin aýrý, ony stıgmatızatsııalaýǵa negiz bolmaýy tıis. Patsıentpen jumys neǵurlym erte bastalsa, emniń sátti ótýi men onyń qalypty ómirge oralý múmkindigi soǵurlym joǵary bolady, — dep atap ótti mınıstr.
Vedomstvonyń málimetinshe, qoldanystaǵy statıstıka táýeldilik máselesiniń naqty aýqymyn tolyq kórsetpeıdi. Táýeldiligi bar adamdardyń edáýir bóligi densaýlyq saqtaý júıesiniń nazarynan tys qalyp otyr. Mamandardyń baǵalaýynsha, halyqtyń shamamen 25%-y qaýip tobyna jatady jáne der kezinde keńes berýdi, profılaktıkalyq qoldaýdy ári táýeldilik faktorlaryn erte anyqtaýdy qajet etedi.
Osyǵan baılanysty Mınıstrlik táýeldiliktiń saldarymen kúresýden onyń aldyn alýǵa jáne erte anyqtaýǵa basymdyq berýdi josparlap otyr. Bul úshin vedomstvoaralyq ózara is-qımyl kúsheıtilip, qaýip toptaryn anyqtaý tetikteri jetildiriledi, sondaı-aq narkologııalyq aýrýlardy monıtorıngteýdiń neǵurlym obektıvti tásilderi engiziledi.
Jasóspirimder men jastarǵa erekshe kóńil bólinedi. Mınıstrlik kámeletke tolmaǵandarǵa anonımdi konsýltatsııa alý múmkindigin keńeıtýdi, medıtsınalyq aqparatty kodtaý júıesin jetildirýdi jáne qaýipti minez-qulyqty erte anyqtaýdyń tıimdi tetikterin qalyptastyrýdy tapsyrdy.
— Tapsyrmalardyń jeke blogy narkologııalyq qyzmettiń materıaldyq-tehnıkalyq bazasyn nyǵaıtýǵa arnalǵan. Óńirlik densaýlyq saqtaý basqarmalary men medıtsınalyq uıymdardyń basshylaryna qajetti qarjylandyrý deńgeıin qamtamasyz etý, beıindi ortalyqtardyń materıaldyq jaraqtandyrylýyn jaqsartý jáne mamandandyrylǵan kómek kórsetý úshin zamanaýı jaǵdaı jasaý júkteldi, — delingen habarlamada.
Sonymen qatar Mınıstrlik medıtsınalyq kýálandyrý júrgizýge baqylaýdy kúsheıtýdi josparlap otyr. Ásirese alkogoldik mas bolýdy anyqtaý rásimderiniń jáne saraptamalardyń belgilengen tártipke saı ótkizilýine, zertteý nátıjeleriniń obektıvtiligine, rásimderdi mindetti túrde beınetirkeýge jáne el aýmaǵynda biryńǵaı jumys standarttaryn engizýge erekshe nazar aýdarylady.
Atalǵan sharalardy iske asyrý narkologııalyq kómektiń qoljetimdiligin arttyrýǵa, qyzmettiń profılaktıkalyq baǵytyn kúsheıtýge, táýeldilikterdi erte anyqtaýǵa jáne halyqtyń psıhıkalyq densaýlyǵyn saqtaý salasyndaǵy densaýlyq saqtaý júıesiniń tıimdiligin arttyrýǵa múmkindik beredi.
Buǵan deıin depýtat synynan keıin DSM eldegi narkologııalyq ortalyqtardy qatań tekseriske alǵanyn jazǵan edik.
