Annalena Berbok: BUU-ǵa reforma kerek
NЬıÝ-IORK. KAZINFORM — BUU Bas Assambleıasynyń 80-sessııasynyń tóraıymy, Germanııanyń burynǵy syrtqy ister mınıstri Annalena Berbok Bas Assambleıanyń jalpy saıası pikirtalasy barysynda sóz sóıledi, dep jazdy Kazinform agenttiginiń tilshisi.
Berbok qazirgi otyrys soǵys, gýmanıtarlyq apattar, klımattyń ózgerýi jáne tehnologııalyq syn-qaterler sııaqty kópqyrly daǵdarystar aıasynda ótip jatqanyn atap ótip, bul máselelerdi tek halyqaralyq qaýymdastyq birlese otyryp qana sheshe alady dedi.
Ol álemniń túkpir-túkpirinde mıllıondaǵan adamdar kún saıyn bastan keship jatqan tragedııalardy eske saldy: mysaly, ushqyshsyz apparattardan tyǵylýǵa májbúr ýkraınalyq qart áıelder, mektepke barýǵa qorqatyn gaıtılik balalar, nemese Kongo Demokratııalyq Respýblıkasynda qyzdaryn qarýly toptardan jasyryp júrgen áıelder.
— Ne isteýge bolmaıdy — bul osy daǵdarystardy paıdalanyp, BUU eskirdi nemese mańyzy joq dep aıtýǵa jol berý. BUU Jarǵysy myqty jáne ol memleketter ony ustanýǵa qanshalyqty daıyn bolsa — sonshalyqty berik, — dedi Berbok.
BUU reformasy — zaman talaby
Berbok sózinde BUU-nyń qurylýyna sebep bolǵan tarıhı sátti — Ekinshi dúnıejúzilik soǵystan keıingi qıraǵan álemdi eske saldy. Ol kezde qol qoıylǵan BUU Jarǵysy tutas bir urpaq úshin baǵyt-baǵdar bolatyn «juldyz» rólin atqarǵan.
— BUU-nyń tarıhy — jeńister tarıhy emes, bul — qaıta-qaıta áreket jasap, tabandylyqpen jumys istegenderdiń tarıhy, — dedi ol.
Berbok elderge naǵyz kóshbasshylyq — óz erkin zorlyqpen tańý emes, ózgelerge shabyt berip, qoldaý kórsetý qabileti ekenin eske saldy.
— Basqalarǵa kómektesý — túptep kelgende, óz elińdi de kúsheıtedi, — dedi ol, COVID-19 pandemııasyna qarsy kúrestegi DDSU róline jáne klımattyq daǵdarysqa qarsy birlesken is-qımyldyń mańyzdylyǵyna toqtala otyryp.
Onyń aıtýynsha, BUU búgingi tańda sheshýshi jolaıryqta tur.
— Dıalog pen dıplomatııa «úıiniń» ózi de jóndeýdi qajet etedi. Sondyqtan «BUU-80» bastamasy men reformalar protsesi — artyqshylyq emes, qajettilik, — dedi Berbok.
Reforma júıeniń ıkemdiligi men tıimdiligin arttyrýǵa, sondaı-aq Turaqty damý maqsattaryna qol jetkizý úderisin jedeldetýge baǵyttalýy tıis.
Genderlik teńdik máselesi
Annalena Berbok BUU-daǵy áıelderdiń kóshbasshylyqtaǵy ornyna erekshe nazar aýdardy. Ol uıymnyń 80 jyl ishinde eshqashan áıel adamdy Bas hatshy etip saılamaǵanyn synǵa aldy.
— Tórt mıllıard áıel ómir súretin álemde birde-bir laıyqty úmitker tabylmaǵany ma, — dep, ózgeris qajettigin basa aıtty.
Bolashaq — birlikke baılanysty
Sóz sońynda Berbok BUU bolashaǵy — memleketterdiń birigip áreket etý qabiletine baılanysty ekenin atap ótti:
— Biz álem halqynyń aldynda BUU búgin de bar ekenin, erteń de, aldaǵy 80 jylda da ómirsheń bolatynyn dáleldeı alamyz ba? Sebebi túptep kelgende, bul uıym — barlyq elder úshin ómirlik mańyzy bar qural.
Aıta keteıik, BUU Bas Assambleıasy jıynynda sóz alǵan Donald Tramp BUU-ny synǵa aldy.