Anna Danılına juptyq synda Gambýrg jarysynyń jeńimpazy atandy

ASTANA. QazAqparat – Qazaqstannyń juptyq syndaǵy birinshi, álemniń 25-raketkasy Anna Danılına Gambýrg (Germanııa) WTA 250 týrnıriniń jeńimpazy atandy, dep habarlaıdy QazAqparat tilshisi.

Jarystyń 1-raketkasy bolyp tirkelgen qazaqstandyq tennısshi men reseılik Aleksandra Panova fınalda chehııalyq Mırıam Kolodzıeeva – amerıkalyq Anjela Kýlıkovamen bas júldeni sarapqa saldy.

Birinshi partııada qazaqstandyq-reseılik jup 6:4 esebimen basym tústi.

Ekinshi sette de 3:1 esebimen alǵa ketti. Taǵy bir breık – 5:2. Sodan keıin matchqa dop bergende, múlt ketken joq – 6:2.

Bir saǵattan astam ýaqytqa sozylǵan báseke barysynda Danılına men Panova 1 eıspen birge 12 breık-poınttyń teń jartysyn paıdalandy. Qarsylas dýet 3 breıkpen (6 breık-poınt) shekteldi.

Eske sala keteıik, budan buryn Prezıdent kýbogynda Denıs Evseevtiń fınalǵa joldama alǵanyn jazǵan bolatynbyz.