Anna Danılına jyldyń qorytyndy týrnırine joldama aldy
ASTANA. KAZINFORM – Qazaqstannyń juptyq syndaǵy birinshi, álemniń 6-raketkasy Anna Danılına bıylǵy WTA qorytyndy týrnırinde óner kórsetedi.
Áıelder tennısi qaýymdastyǵynyń baspasóz qyzmetinen málim etkenindeı, qazaqstandyq tennısshi serbııalyq Aleksandra Krýnıchpen birge Indıan-Ýellste 8-15 qarashada ótetin WTA Finals jarysyna merziminen buryn joldama aldy.
Bıylǵy maýsymda A.Danılına – A.Krýnıch Dohadaǵy dodada jeńimpaz atandy. Oǵan qosa eki ret «Úlken dýlyǵa» týrnıriniń fınalyna deıin jetti.
Bul A.Danılına úshin osyndaı ekinshi qorytyndy jarys bolmaq. Ol 2022 jyly baq synaǵan edi. Al A.Krýnıch alǵash ret qatysqaly otyr.
Danılına men Krýnıchten bólek, qorytyndy dodaǵa chehııalyq Katerına Sınıakova – amerıkalyq Teılor Taýnsend, kanadalyq Gabrıela Dabrovskı – brazılııalyq Lýıza Stefanı barady. Qalǵan tórt joldama ıeleri kúzgi jarystardyń nátıjesi boıynsha anyqtalady.
A.Danılına – A.Krýnıch qazirgi kezde Nıý-Iork qalasynda ótip jatqan AQSh ashyq chempıonatynda 3-raketka bolyp tirkelgen. Qazaqstandyq-serbııalyq jup bastapqy kezdesýin Chılı ókili Aleksa Gýarachı – mysyrlyq Maıar Sherıfpen ótkizedi.
Ótken jyly WTA qorytyndy týrnırinde jekeleı synda qazaqstandyq Elena Rybakına úzdik shyqqan bolatyn. Ol bıyl WTA chempıondyq kestesinde kósh bastap keledi.
Eske sala keteıik, budan buryn AQSh ashyq chempıonatynda ıÝlııa Pýtıntsevanyń Olımpıada chempıonyn qapy qaldyrǵanyn jazǵan edik.
Sondaı-aq Aleksandr Býblık qarsylasyn aıqyn basymdylyqpen jeńdi.
