Anna Danılına Ulybrıtanııadaǵy jarysta top jardy

ASTANA. KAZINFORM — Qazaqstannyń juptyq syndaǵy birinshi, álemniń 9-raketkasy Anna Danılına Istbýrn (Ulybrıtanııa) WTA 250 týrnıriniń chempıony atandy.

Osyǵan deıin Rolan Garros, London, Nottıngem jarystarynda fınalǵa deıin jetken qazaqstandyq tennısshi bul joly chehııalyq Marı Boýzkovamen birge baq synaǵan edi.

Qazaqstandyq-chehııalyq jup sońǵy básekede aýstralııalyq Maııa Djoınt — Qytaılyq Taıbeı ókili Se Shýveımen bas júldeni sarapqa saldy.

Búgin álemniń 51-raketkasy, 19 jastaǵy M.Djoınt jekeleı synda fınalda reıtıngide 74-oryndaǵy fılıppındik Aleksandra Ealany 6:4, 1:6, 7:6 (12:10) esebimen utyp, chempıon atandy. Tartysty ótken match 2 saǵat 38 mınýtqa sozyldy.

Osydan keıin ile-shala M.Djoıntqa juptyq synda kortqa shyǵýǵa týra keldi.

Birinshi partııada Danılına — Boýzkova 2:0, 4:2 esebimen alǵa shyqqanymen, Djoınt — Shýveı tarazy basyn teńestirdi. Degenmen qazaqstandyq-chehııalyq dýet taǵy bir breıkpen birge óz geımin de aldy — 6:4.

Ekinshi sette esep 1:1 bolǵan mezette Danılına — Boýzkova breık jasaǵanymen, qarsylastary uzatpady — 2:2. Sodan keıin esep 5:3 bolyp, aýstralııalyq-taıbeılik jup setke dop bergenimen, ol múmkindigin paıdalana almady. Aqyry Danılına — Boýzkova degenine jetti — 7:5.

Bir saǵat 23 mınýtqa sozylǵan básekede Anna Danılına — Marı Boýzkova 3 eıspen birge 13 breık-poınttyń beseýin qur jibermedi. Djoınt — Shýveı 2 eıs, 3 breıkpen (10 breık-poınt) erekshelendi.

Osylaısha, A.Danılına Ýımbldon aldynda Istbýrnda top jardy.

Eske sala keteıik, budan buryn Jibek Qulambaevanyń Serbııadaǵy týrnırde chempıondyq ataq úshin talasatynyn jazǵan edik.