Anna Danılına Tokıodaǵy týrnırdiń shırek fınalyna shyqty

ASTANA. KAZINFORM — Qazaqstannyń juptyq syndaǵy birinshi, álemniń 13-raketkasy Anna Danılına Tokıo (Japonııa) WTA 500 týrnıriniń shırek fınalyna joldama aldy.

Jarystyń 3-raketkalary A.Danılına – serbııalyq Aleksandra Krýnıchpen birge bastapqy kezdesýin meksıkalyq Djýlıana Olmos – ındonezııalyq Aldıla Sýtdjıadjımen ótkizdi.

Bir saǵattan sál astam ýaqytqa sozylǵan match Danılına men Krýnıchtiń aıqyn basymdylyǵymen aıaqtaldy – 6:1, 6:3.

Anna Danılına – Aleksandra Krýnıchtiń kelesi qarsylastary keıin anyqtalady.

Jekeleı synda Qazaqstannyń birinshi, álemniń 7-raketkasy Elena Rybakınanyń Tokıodaǵy alǵashqy qarsylasy búgin belgili boldy. 

Álemniń 22-raketkasy, kanadalyq Leıla Fernandes birinshi aınalymda reıtıngide 54-oryndaǵy grekııalyq Marııa Sakkarıdi 7:6 (7:5), 6:4 esebimen jeńdi. Osylaısha, Rybakına ekinshi aınalymda Fernandespen sheberlik baıqasady.

Taǵy bir qazaqstandyq, álemniń 76-raketkasy ıÝlııa Pýtıntseva Gýanchjoý (Qytaı) WTA 250 týrnıriniń alǵashqy aınalymynda reıtıngide 165-satydaǵy reseılik Alına Korneevany joldan taıdyrdy – 7:6 (7:2), 4:6, 6:4. Asa tartysty ótken báseke 2 saǵat 28 mınýtqa sozyldy. 

Pýtıntseva shırek fınalǵa shyǵý úshin álemniń 96-raketkasy, germanııalyq Ella Zaıdelmen talasady.

Eske sala keteıik, budan buryn Elena Rybakınanyń álemdik reıtıngide 7-orynǵa kóterilgenin jazǵan edik.