Anna Danılına Rolan Garros týrnıriniń jartylaı fınalyna ótti
ASTANA. KAZINFORM — Qazaqstannyń juptyq syndaǵy birinshi, álemniń 6-raketkasy Anna Danılına Rolan Garros týrnıriniń jartylaı fınalyna joldama aldy.
Serbııalyq Aleksandra Krýnıchpen birge «Úlken dýlyǵa» dodasynyń 2-raketkasy bolyp tirkelgen qazaqstandyq tennısshi shırek fınalda aýstralııalyq Ellen Peres – nıderlandylyq Demı Shıýrspen sheberlik baıqasty.
Birinshi partııada qazaqstandyq-serbııalyq jup 6:2 esebimen basymdylyq tanytty.
Ekinshi set tartystyraq órbip, taı-breıkte Danılına – Krýnıch jeńisti julyp aldy – 7:6 (8:6).
Bir saǵat 39 mınýtqa sozylǵan básekede Anna men Aleksandra 10 breık-poınttyń tórteýin múlt jibergen joq. Aýstralııalyq-nıderlandylyq dýet 2 breıkpen (3 breık-poınt) shekteldi.
Osylaısha, Anna Danılına – Aleksandra Krýnıch fınalǵa shyǵý úshin japonııalyq Sıýko Aoıama – taıbeılik En-Shýo Lıanmen talasady.
Bıylǵy Rolan Garrostyń jalpy júlde qory 61,723 mln eýroǵa baǵalanǵan. Juptyq synda jeńimpaz atanǵandar 600 myń eýro tabys tabady.
Frantsııa ashyq chempıonatynda A.Danılına men A.Krýnıch ótken jyly fınalǵa deıin jetip, ıtalııalyqtar Sara Erranı men Jasmın Paolınıge jol bergen edi – 4:6, 6:2, 1:6.
Jasóspirimder arasynda Rolan Garros týrnırinde 17 jastaǵy qazaqstandyq Zańǵar Nurlanuly shırek fınalǵa shyǵa almady.
Dodanyń 8-raketkasy bolyp tirkelgen Zańǵar úshinshi aınalymda brazılııalyq Leonardo Shtork Frankamen matchty sátti bastady – 6:3. Alaıda budan keıin brazılııalyq sportshy kúsh alyp ketti – 7:6 (7:3), 7:5.
Tartysty match 2 saǵat 55 mınýtqa sozyldy.
Sársenbi kúni sensatsııalyq nátıje áıelder arasyndaǵy jekeleı synda tirkeldi. Álemniń 1-raketkasy, Belarýs ókili Arına Sobolenko kútpegen jerden reıtıngide 23-oryndaǵy reseılik Dıana Shnaıderden utylyp qaldy – 6:3, 5:7, 0:6. Sóıtip ol jartylaı fınaldan tys qaldy.
Ótken jyly fınalǵa deıin jetken Arına bıyl sol kórsetkishin qaıtalaı almady. Bul álemniń 2-raketkasy, qazaqstandyq Elena Rybakınaǵa álemdik reıtıngide A.Sobolenkomen arasyndaǵy upaı aıyrmashylyǵyn qysqartýǵa múmkindik berdi. Qazirgi kezde A.Sobolenkonyń enshisinde 9 090, Elenada 8 143 upaı bar.
Eske sala keteıik, budan buryn Zańǵar Nurlanulynyń Rolan Garros týrnıriniń 1/8 fınalyna shyqqanyn jazǵan edik.
