Anna Danılına London týrnıriniń fınalynda utylyp qaldy

ASTANA. KAZINFORM – Qazaqstannyń juptyq syndaǵy birinshi, álemniń 9-raketkasy Anna Danılına London (Ulybrıtanııa) WTA 500 týrnırinde óner kórsetti.

Qazaqstandyq tennısshi reseılik Dıana Shnaıdermen birge jarystyń 2-raketkalary bolyp tirkelgen edi.

Olar fınalda dodanyń 4-raketkalary, amerıkalyq Aısha Mýhammad – nıderlandtyq Demı Shýrspen chempıondyq ataqty sarapqa saldy.

Amerıkalyq-nıderlandtyq jup shırek fınalda qazaqstandyqtar ıÝlııa Pýtıntseva – Elena Rybakınany (6:1, 7:5) esebimen qapy qaldyrǵan edi. Sodan keıin jartylaı fınalda týrnırdiń 1-raketkalary, ýkraınalyq Lıýdmıla Kıchenok – jańazelandııalyq Erın Rýtlıfti aıqyn basymdyqpen utty – 6:1, 6:2.

Al A.Danılına úshin bul qatarynan ekinshi fınal edi. Qazaqstandyq tennısshi osynyń aldynda sporttyq jolynda alǵash ret Rolan Garros týrnıriniń fınalyna deıin jetti.

Bul joly birinshi partııada esep 5:4 bolyp, qazaqstandyq-reseılik jup setke dop bergende, sol múmkindikti paıdalana almady - 5:7.

Ekinshi sette olar 5:1esebimen alǵa ketkenimen, qarsylas dýet tarazy basyn teńestirdi. Degenmen taı-breıkte Danılına - Shnaıder basymdylyq tanytty - 7:6 (7:3).

Sýper taı-breıkte amerıkalyq-nıderlandtyq jup des bermedi - 10:4.

Tartysty match 1 saǵat 45 mınýtqa sozyldy.

Eske sala keteıik, budan buryn Anna Danılınanyń London týrnırinde chempıondyq ataq úshin talasatynyn jazǵan bolatynbyz.