Anna Danılına Eýropadaǵy jarystyń fınalyna joldama aldy
NUR-SULTAN. QazAqparat – Qazaqstannyń juptyq syndaǵy birinshi, álemniń 21-raketkasy Anna Danılına Madrıdte ótip jatqan ITF W60 týrnıriniń fınalyna joldama aldy, dep habarlaıdy QazAqparat tilshisi.
Qazaqstandyq tennısshi reseılik Anastasııa Tıhonovamen birge jartylaı fınalda majarstandyq Tımeıa Babosh – reseılik Valerııa Savınyhpen oınady.
Qazaqstandyq-reseılik jup úsh setke sozylǵan tartysty matchta 6:4, 3:6, 10:8 esebimen jeńiske jetti.
Juma kúni A.Danılına men A.Tıhonova sońǵy básekede qytaılyq Lý Tszıa Tsın – japonııalyq ıÝ Sıaodımen bas júldeni sarapqa salady.
Qazaqstandyq tennısshi úshin bul – sońǵy 10 kúndegi ekinshi fınal.
Erler arasyndaǵy dodalarda juptyq synda Andreı Golýbev pen Grıgorıı Lomakın jarys jolynan shyǵyp qaldy.
A.Golýbev argentınalyq Maksımo Gonsalespen birge Galle (Germanııa) ATP 500 týrnıriniń shırek fınalynda horvatııalyq Ivan Dodıg – amerıkalyq Ostın Kraıchekke ese jiberdi – 6:7 (3:7), 2:6.
G.Lomakın ýkraınalyq Vladıslav Manafovpen birge Frantsııadaǵy Blýa chellendjer jarysynyń shırek fınalynda úndistandyqtar Shrırambalaı Naraıanasvamı – Djıvan Nedýnchejııange jol berdi – 7:6 (7:3), 4:6, 5:10.
Eske sala keteıik, budan buryn qazaqstandyq tennısshiniń Ispanııadaǵy jarystyń jartylaı fınalyna ótkenin jazǵan bolatynbyz.
Sondaı-aq qazaqstandyq tennısshi Frantsııadaǵy týrnırdiń shırek fınalyna shyqty.
Qazaqstandyq tennısshiler AQSh-taǵy týrnırdi jeńispen bastady.
