Anna Danılına Dýbaıdaǵy jarystyń jartylaı fınalyna shyqty

ASTANA. KAZINFORM – Qazaqstannyń juptyq syndaǵy birinshi, álemniń 7-raketkasy Anna Danılına Dýbaı WTA 1000 týrnıriniń jartylaı fınalyna ótti.

Jarystyń 4-raketkasy bolyp tirkelgen A.Danılına serbııalyq Aleksandra Krýnıchpen birge shırek fınalda ýkraınalyq Lıýdmıla Kıchenok – amerıkalyq Dezıre Kravchıkke tap keldi.

Birinshi partııada qazaqstandyq-serbııalyq jup aıqyn basymdylyq tanytty – 6:1. 

Ekinshi set Kıchenok – Kravchıktiń enshisinde ketti – 6:4. Degenmen sýper taı-breıkte Danılına – Krýnıch tórtinshi matchbolyn qur jibermedi – 10:6. 

Bir saǵat 28 mınýtqa sozylǵan básekede qazaqstandyq-serbııalyq dýet eıs jasamaǵanymen, 13 breık-poınttyń altaýyn paıdalandy. Kıchenok – Kravchık 2 eıs, 4 breıkpen (5 breık-poınt) kózge tústi.

Anna Danılına – Aleksandra Krýnıchtiń jartylaı fınaldaǵy qarsylastary keıin anyqtalady.

Osylaısha, ótken aptada Dohada top jarǵan Danılına – Krýnıch jeńis serııasyn alty matchqa jetkizdi. 

Eske sala keteıik, budan buryn Anna Danılınanyń Dýbaıdaǵy týrnırdiń shırek fınalyna joldama alǵanyn jazǵan edik.

Dýbaıdaǵy týrnırde Rybakına úshinshi sette matchty jalǵastyrýdan bas tartty.