Anna Danılına Dýbaıdaǵy týrnırdiń fınalynan tys qaldy
ASTANA. KAZINFORM – Qazaqstannyń juptyq syndaǵy birinshi, álemniń 7-raketkasy Anna Danılına Dýbaı WTA 1000 týrnıriniń fınalyna shyǵa almady.
Qazaqstandyq tennısshi serbııalyq Aleksandra Krýnıchpen birge jarystyń 4-raketkasy bolyp tirkelse, olardyń jartylaı fınaldaǵy qarsylastary, kanadalyq Gabrıela Dabrovskı – brazılııalyq Lýıza Stefanı besinshi jup retinde dodaǵa qosylǵan edi.
Osyǵan deıin A.Danılına – A.Krýnıch Doha WTA 1000 jarysynyń jartylaı fınalynda G.Dabrovskı – L.Stefanıdiń jolyn kesken edi. Bul joly birinshi partııada qazaqstandyq-serbııalyq jup 3:1 esebimen alǵa shyǵyp, sol basymdylyǵyn joǵaltqan joq – 6:4.
Ekinshi sette Dabrovskı – Stefanı qarymta qaıyrdy – 6:2. Sodan keıin sýper taı-breıkte sátti oınady – 10:6. Saǵat jarymǵa sozylǵan básekede Danılına – Krýnıch 1 eıspen birge 8 breık-poınttyń úsheýin paıdalandy. G.Dabrovskı – L.Stefanı 2 eıs, 4 breıkpen (9 breık-poınt) kózge tústi.
Anna Danılına – Aleksandra Krýnıch buǵan deıin Aýstralııa chempıonatynyń fınalyna deıin jetip, Dohada top jarǵan edi.
Eske sala keteıik, budan buryn Anna Danılınanyń Dýbaıdaǵy jarystyń jartylaı fınalyna shyqqanyn jazǵan edik.
