Anna Danılına Doha týrnıriniń chempıony atandy

ASTANA. KAZINFORM – Qazaqstannyń juptyq syndaǵy birinshi, álemniń 10-raketkasy Anna Danılına Doha (Qatar) WTA 1000 týrnıriniń fınalynda óner kórsetti.

A.Danılına serbııalyq Aleksandra Krýnıchpen birge jarystyń 4-raketkasy bolyp tirkelgen edi.

Qazaqstandyq-serbııalyq jup fınalda dodanyń 3-raketkalary, latvııalyq Elena Ostapenko – taıbeılik Se Shýveımen bas júldeni sarapqa saldy.

Bıyl Doha dodasynyń júlde qory 4 mln 088,211 myń AQSh dollaryna baǵalanǵan edi. Juptyq saıys jeńimpazdary 195 myń dollarǵa qosa 1 myń reıtıngilik upaı alady.

Osyǵan deıin A.Danılına – A.Krýnıch Aýstralııa ashyq chempıonatynyń fınalyna deıin jetken edi.

Bul joly birinshi partııada Ostapenko – Shýveı bet qaratpady – 6:0.

Tartysty órbigen ekinshi sette taı-breıkte Danılına – Krýnıch tarazy basyn ózderine aýdara aldy – 7:6 (7:3).

Sodan keıin sýper taı-breıkte jeńisti julyp aldy – 10:8.

Bir saǵat 35 mınýtqa sozylǵan básekede qazaqstandyq-serbııalyq dýet 1 eıspen birge 4 breık-poınttyń úsheýin paıdalandy. Latvııalyq-taıbeılik jup 6 breıkpen (10 breık-poınt) kózge tústi.

Osylaısha, Anna Danılına – Aleksandra Krýnıch iri jarysta úzdik shyqty.

Eske sala keteıik, budan buryn Anna Danılınanyń qatarynan ekinshi týrnırde fınalǵa shyqqanyn jazǵan edik.

Aleksandr Býblık Rotterdam týrnırinde fınalǵa shyǵý úshin talasady.