Anna Danılına Chehııadaǵy jarystyń jeńimpazy atandy
ASTANA. QazAqparat - Qazaqstannyń juptyq syndaǵy birinshi raketkasy Anna Danılına Chehııanyń ıAblonets-nad-Nısoý qalasynda ótken ITF W25 týrnıriniń jeńimpazy atandy, dep habarlaıdy QazAqparat tilshisi.
A. Danılına ýkraınalyq Valerııa Strahovamen birge jarystyń birinshi raketkasy bolyp tirkeldi.
Qazaqstandyq-ýkraınalyq jup fınalǵa deıin qınalmaı jetti.
Sońǵy básekede Danılına men Strahova germanııalyq Lena Papadakıs - chehııalyq Anna Sıskovany 7:5, 6:1 esebimen tize búktirdi.
Osylaısha, A. Danılına sporttyq jolynda ITF dodalarynda 27-tıtýlyna qol jetkizdi. Sonymen qatar, Anna WTA jarystarynyń úsh dúrkin chempıony atanǵan edi.
Eske sala keteıik, budan buryn tennısten Devıs kýbogynda Qazaqstan tobynda shırek fınalǵa shyqqan komandalar anyqtalǵanyn jazǵan bolatynbyz.
Sondaı-aq, qazaqstandyq jasóspirim tennısshiler alǵash ret Azııa chempıony atandy.
