Anna Danılına Aýstralııadaǵy jarystyń fınalynan tys qaldy

ASTANA. KAZINFORM – Qazaqstannyń juptyq syndaǵy birinshi, álemniń 23-raketkasy Anna Danılına Adelaıda WTA 500 týrnıriniń fınalyna shyǵa almaı qaldy.

Qazaqstandyq tennısshi reseılik Irına Hromachevamen birge jartylaı fınalda brazılııalyq Beatrıs Haddad Maııa – germanııalyq Laýra Zıgemýndpen sońǵy básekeniń joldamasyn sarapqa saldy.

Birinshi partııada brazılııalyq-germanııalyq dýet basymdylyq tanytty – 6:2.

Ekinshi sette esep 5:5 bolǵan mezette Danılına – Hromacheva breık jasap ketti – 7:5. Alaıda sýper taı-breıkte qarsylastary sátti oınady – 10:7.

Bir saǵat 54 mınýtqa sozylǵan tartysty matchta qazaqstandyq-reseılik jup 2 eıspen birge 7 breık-poınttyń bireýin ǵana paıdalandy. Haddad Maııa – Zıgemýnd 1 eıs, 2 breıkpen (12 breık-poınt) kózge tústi.

Eske sala keteıik, budan buryn otandyq tennısshilerdiń Aýstralııa ashyq chempıonatyndaǵy qarsylastary anyqtalǵanyn jazǵan bolatynbyz.