Anna Danılına álemdik reıtıngide TOP-5-ke qaıta kirdi
ASTANA. KAZINFORM — Áıelder tennısi qaýymdastyǵy (WTA) jekeleı jáne juptyq synda jańartylǵan reıtıngini jarııa etti.
Qazaqstannyń juptyq syndaǵy birinshi raketkasy Anna Danılına 6 895 upaımen 8-den 5-orynǵa kóterildi. Sóıtip ol óziniń úzdik kórsetkishine (4) jaqyndady.
Qazaqstandyq tennısshiniń aldynda onyń burynǵy juptasy, serbııalyq Aleksandra Krýnıch (6 905 upaı) tur.
A.Danılına amerıkalyq Eıja Mýhammadpen birge Rım (Italııa) WTA 1000 týrnıriniń shırek fınalyna deıin jetip, onda reseılikter Mırra Andreeva – Dıana Shnaıderge jol bergen edi. Keıin M.Andreeva – D.Shnaıder chempıon atandy.
Qazaqstandyq tennısshi osy aptada reseılik Ekaterına Aleksandrovamen birge Strasbýrg (Frantsııa) WTA 500 týrnırinde óner kórsetedi.
Juptyq syn reıtıngisinde ıÝlııa Pýtıntseva 142-den 181-ge, Jibek Qulambaeva 187-den 195-ke tómendedi.
Jekeleı synda álemdik reıtıngide Belarýs ókili Arına Sobolenko 9 960 upaımen kósh bastasa, Qazaqstannyń birinshi raketkasy Elena Rybakına (8 705 upaı) ekinshi satyda.
ıÝ.Pýtıntseva jekeleı synda 77-den 75-ke, J.Qulambaeva 391-den 384-ke kóterildi.
E.Rybakına WTA chempıondyq kestesinde 4 312 upaımen burynǵysha birinshi satyda keledi.
A.Sobolenko (4 080 upaı) ekinshi orynda.
Rım WTA 1000 jarysynda shırek fınalda E.Rybakınany joldan taıdyryp, keıin chempıon atanǵan ýkraınalyq Elına Svıtolına 3 460 upaımen úzdik úshtikke endi.
Eske sala keteıik, budan buryn Aleksandr Býblıktiń Jeneva jarysynda baq synaıtynyn jazǵan edik.
