Anna Danılına Ábý-Dabıde shırek fınaldan tys qaldy

ASTANA. KAZINFORM – Qazaqstannyń juptyq syndaǵy birinshi, álemniń 44-raketkasy Anna Danılına Ábý-Dabı (BAÁ) WTA 500 týrnıriniń shırek fınalyna shyǵa almady.

Qazaqstandyq tennısshi ýkraınalyq Nadejda Kıchenokpen birge alǵashqy aınalymda kúshti jup — jarystyń 2-raketkalary, brazılııalyqtar Beatrıs Haddad Maııa — Lýıza Stefanıge tap boldy.

Qazaqstandyq-ýkraınalyq jup básekeni jaqsy bastady — 6:2. Alaıda budan keıin brazılııalyqtar sátti oınady — 7:5, 10:6.

Eki saǵatqa jýyq ýaqytqa sozylǵan matchta Danılına — Kıchenok 4 breık-poınttyń ekeýin paıdalandy. Qarsylastary 2 eıs, 1 breıkpen (5 breık-poınt) erekshelendi. 

Jekeleı synda Qazaqstannyń birinshi, álemniń 5-raketkasy Elena Rybakınanyń bastapqy qarsylasy anyqtaldy. 

Álemniń 71-raketkasy, amerıkalyq Danıel Kollınz «Úlken dýlyǵa» týrnıriniń tórt dúrkin chempıony, qazir reıtıngide 757-oryndaǵy japonııalyq Naomı Osakany utty — 7:5, 6:0. 

Osylaısha, ekinshi aınalymda E.Rybakına men D. Kollınz kezdesetin boldy.

Eske sala keteıik, budan buryn qazaqstandyq tennısshiniń Marsel týrnırinde ótken jylǵy fınalısti jeńgenin jazǵan bolatynbyz.