Anna Bashınskaıa ketti: jańa máslıhat depýtaty qashan saılanady

ALMATY. QazAqparat - Anna Bashınskaıanyń ornyna №4 birmandattyq aýmaqtyq saılaý okrýginde máslıhat depýtatynyń qosymsha saılaýy ótedi, dep habarlaıdy QazAqparat tilshisi.

Almaty qalasy aýmaqtyq saılaý komıssııasynyń tóraǵasy Aıgúl Qalyqovanyń aıtýynsha, saılaý kúni áli belgilengen joq.
«Zań boıynsha qosymsha saılaý naýryz ben qazan aıynyń sońǵy jeksenbisinde ótkiziledi. Alaıda, Ortalyq saılaý komıssııasynyń kelisimimen basqa ýaqyt tańdalýy múmkin. Ondaı bolǵan jaǵdaıda daýys berý №4 birmandattyq aýmaqtyq saılaý okrýginde ótedi»,- dedi ol.

Aıtýynsha, Anna Bashınskaıa depýtat qyzmetinen bosatý týraly aryzyn búgin ákelgen.

«Onyń ózindik protsedýrasy bar. Biz eń aldymen máslıhatqa joldaımyz, máslıhat ornynan bosatý týraly sheshim shyǵarady. Tek sodan keıin ǵana qosymsha saılaý ótedi»,- dep túsindirdi.Aıta keteıik, Almaty qalalyq Máslıhatynyń depýtaty Anna Bashınskaıa Ýkraına Prezıdenti Vladımır Zelenskııdiń «Deutsche Welle» basylymyna bergen suhbatynda Qyrymdy qaıtarý týraly málimdemesine «Zelenskıı myrza, Qyrymnan kóri Túrkııa durys, ol jaqtyń aýa raıy qolaıly» degen maǵynada pikir qaldyrǵan.Depýtattyń bul pikiri áleýmettik jeli qoldanýshylarynyń narazylyǵyn týdyryp, olar depýtattyń mandatyn tapsyrýyn talap etti.Keıinirek depýtat osy pikiri úshin qazaqstandyqtardan keshirim surady.Keshe AMANAT partııasy Bashınskaıanyń málimdemesine qatysty pikir bildirdi.