Ániń tyńdarman júregine jetse, odan asqan baqyt joq – Jaskeleń Ǵaısaǵalıev

ORAL. KAZINFORM — Mádenıet jáne óner qyzmetkerleri kúnine oraı Ǵ.Qurmanǵalıev atyndaǵy Batys Qazaqstan oblystyq fılarmonııasynyń solısi, kompozıtor Jaskeleń Ǵaısaǵalıevke «Qazaqstannyń eńbek sińirgen qaıratkeri» qurmetti ataǵy berildi. Osyǵan oraı Kazinform tilshisi óner qaıratkerine birneshe saýal qoıǵan edi.

- Jaskeleń Orynbasaruly, marapat qutty bolsyn! Bul osy saladaǵy uzaq jylǵy eńbegińizge berilgen joǵary baǵa shyǵar?

- Árıne, solaı dep oılaımyn. Prezıdent Jarlyǵymen Mádenıet jáne óner qyzmetkerleriniń kúni 2013 jyldan beri atalyp ótilip keledi. Azdy-kópti eńbegimniń elengenine qýanyshtymyn. Bul – ózim ǵana emes, jalpy ujymnyń baǵy janǵan kún dep esepteımin. Jalpy, osy salada qyzmet atqarǵanyma bıyl qyryq jyl tolady eken. Bul az ýaqyt emes.

Qazirgi Syrym aýdany Josaly aýylynda týyp-óstim. Jastaıymnan án men mýzykaǵa jaqyn boldym. Ákem Orynbasar ánshi edi. Meniń óner jolyna túsýime ol da áser etken bolar. Aýylda júrgende-aq jastardyń basyn qosyp, «Nazqońyr» ansamblin qurdym. Ansambl tek osy óńirmen shektelmeı, 1991 jyly «Tamasha» oıyn-saýyq otaýyna qatysty.

Keıin Oral qalasyna aýysyp, shyǵarmashylyq qarym-qabiletim ashyla tústi. Osyǵan deıin «Eren eńbegi úshin» medaline qosa «Mádenıet salasynyń úzdigi» tósbelgisimen marapattaldym.

Osy kezeńde qanshama asýdan óttik, qıyndyqtardy jeńe bildik. Osy marapat sonyń óteýi shyǵar, qýanyshty kúnderimniń biri bolyp este qalatyny anyq.

- Aq Jaıyq jurtshylyǵy ózińizdi ánshi ǵana emes, kompozıtor retinde jaqsy biledi. Shyǵarmashylyq qyryńa da toqtalyp ótseńiz ?

- Án shyǵaryp kele jatqanyma otyz jylǵa jýyqtaǵan eken. Shyǵarmashylyqpen aınalysý ońaı emes. Degenmen týyndylaryń jaryq kórip, tyńdarmandar men kórermender júregine jetip jatsa, kompozıtor úshin odan asqan baqyt joq. Keıde óziń oryndaısyń, keıde ánshi áriptesterim shyrqap jatady. Qazirgi tańda alpysqa jýyq ánim oryndalyp júr. Al kitabyma júzden astam týyndym engizildi.

- Qurmetti ataq jańa tabystarǵa yntalandyratyn bolar?

- Oǵan endi sóz joq. Shyǵarmashylyqty damytýǵa, tyń izdenisterge jol ashady dep oılaımyn. Ózim bolashaqtan úlken úmit kútemin.

- Ǵarıfolla Qurmanǵalıev atyndaǵy fılarmonııaǵa akademııalyq ataq berilmekshi. Buǵan baılanysty ne aıtar edińiz ?

- Iá, qýanyshtyń ústine qýanysh qosyldy. Memleket basshysy keshe bizdiń fılarmonııany sanaýly óner mekemeleriniń qatarynda atap, akademııalyq ataq beriletinin aıtty. Aldaǵy jyly otaý tikkenine alpys jyl tolatyn qara shańyraqta qyzmet etý – zor baqyt, ekiniń biriniń peshenesine jazylmaǵan. Bul – memlekettiń, eldiń bergen baǵasy. Sonymen qatar akademııalyq ataq alyp jatsaq, bul qosymsha jaýapkershilik ústeıdi. Burynǵy tabystarymyz óz aldyna, jańa talaptarǵa saı bolýymyz kerek. Bul jolda aıanbaıtynymyz anyq.

- Áńgimeńizge rahmet! Eńbegińiz jana bersin!

Eske sala keteıik, budan buryn Prezıdent mádenıet salasyndaǵy bir top azamatty memlekettik nagradamen marapattaǵanyn jazǵan edik.

Sondaı-aq Batys Qazaqstanda mádenıet salasynyń úzdikteri marapattaldy.