Ann Lınde: Qazaqstanda qaýipsizdikpen baılanysty jumysty jalǵastyrýǵa nıettimiz

NUR-SULTAN. QazAqparat - EQYU is basyndaǵy tóraıymy, Shvetsııa Syrtqy ister mınıstri Ann Lınde 2010 jyly qabyldanǵan Astana deklaratsııasynyń uıym qyzmetindegi róli joǵary ekenin atap ótti, dep habarlaıdy QazAqparat tilshisi.

«Árıne, EQYU kez kelgen uıymdar men formattar arasyndaǵy kez kelgen yntymaqtastyq úshin ashyq. Biz Qazaqstannyń EQYU-ǵa tóraǵalyǵy kezinde 2010 jyly qatysýshy elder qabyldaǵan Astana deklaratsııasyn talqyladyq. Deklaratsııanyń ózi úlken jetistik jáne EQYU aıasyndaǵy mindettemelerdiń mańyzdylyǵyn kórsetedi. Búginde bul mindettemeler Astana Sammıtiniń rólin nyǵaıtýda», - dedi Ann Lınde elimizge jasaǵan sapary kezinde.

Onyń aıtýynsha, Qazaqstanǵa jasaǵan sapary Shvetsııanyń EQYU-ǵa tóraǵalyǵy kezinde mańyzdy máselelerdi, jalpy qaǵıdattar men mindettemelerdi talqylaýǵa múmkindik beredi.

«Osy qujatqa qol qoıǵan barlyq 57 qatysýshy el Eýropadaǵy qaýipsizdikti qorǵaýǵa, sondaı-aq EQYU-nyń qaýipsizdikti qamtıtyn biregeı tujyrymdamasyn ustanýǵa tıis. Saıası jáne ekonomıkalyq qaýipsizdik, adam quqyqtary, demokratııa, quqyq ústemdigi men teńdik arasyndaǵy baılanys EQYU-nyń jáne onyń jalpyǵa birdeı qaýipsizdik strategııasynyń biryńǵaı negizin quraıdy. Sondaı-aq, biz áıelder quqyǵyna arnalǵan kún tártibin talqyladyq. Bul EQYU úshin taǵy bir mańyzdy basymdyq. Biz genderlik teńdikti jáne áıelderdiń adam quqyqtaryn tolyq paıdalanýdy, áıelderdiń ekonomıkalyq quqyqtaryn ilgeriletýdi jáne olardyń ekonomıkadaǵy rólin kúsheıtýdi ustanatynymyzdy atap ótkim keledi», - dedi EQUY ókili.

A.Lınde EQYU men Qazaqstannyń yntymaqtastyǵy bar barlyq salalardaǵy óńirlik yntymaqtastyqtyń mańyzdylyǵyn erekshe atap ótti.

«Áıelderdiń ekonomıkaǵa qatysýy, klımattyń ózgerýi jáne qaýipsizdik máseleleri boıynsha odan ári yntymaqtastyqqa úmittenemin. Sondaı-aq, COVID-19 indetine baılanysty táýekel máseleleri boıynsha óńirlik yntymaqtastyq salasynda oń úrdisterd qalyptasqanyn atap ótkim keledi. Men EQYU-nyń ofıs baǵdarlamasyna Nur-Sultannyń qoldaý kórsetkeni úshin alǵys aıtamyn. Biz Qazaqstandaǵy qaýipsizdikpen baılanysty barlyq úsh baǵyt boıynsha: saıası-áskerı, ekonomıkalyq-ekologııalyq jáne adamı baǵyttar boıynsha tabysty jumysty jalǵastyrýǵa nıettimiz. Azamattyq qoǵam bul baǵytta mańyzdy ról atqarady jáne mańyzdy seriktes bolyp tabylady», - dep túıindedi Ann Lınde.