Anklavta eki kún ishinde 90-nan astam adam qaza tapty
ASTANA. KAZINFORM – Gaza densaýlyq saqtaý mınıstrligi anklavta eki kún ishinde 90-nan astam adamnyń qaza tapqanyn habarlady. Bul týraly TASS habarlady.
Gaza sektorynda ótken 48 saǵat ishinde Izraıldiń áskerı operatsııasy saldarynan keminde 92 palestındik qaza taýyp, shamamen 220 adam jaralanǵan. Bul týraly Gaza Densaýlyq saqtaý mınıstrligi óziniń Telegram-arnasynda habarlady.
— Sońǵy eki táýlikte Gazada 92 adam qaza taýyp, 219 adam jaralandy, — delingen vedomstvo esebinde.
Mınıstrlik 2023 jyldyń qazan aıynan beri Gazada qaza tapqandardyń jalpy sany 51 157 adamǵa, al jaralanǵandar sany 116 724 adamǵa jetkenin málimdedi.
18 naýryzda Izraıl armııasy qańtarda jarııalanǵan atysty toqtatý rejımin buzyp, Gazadaǵy áskerı áreketterin qaıta bastady. Izraıl Premer-mınıstri Bınıamın Netanıahýdyń keńsesi muny HAMAS qozǵalysynyń AQSh prezıdentiniń arnaıy ókili Stıven Ýıtkoff pen deldaldar usynǵan kelissóz sharttarynan bas tartýymen túsindirdi. Izraıl bul operatsııanyń maqsaty — barlyq tutqyndardy bosatý ekenin aıtty.
Óz kezeginde HAMAS qozǵalysy áskerı áreketterdiń qaıta bastalýyna Izraıl men AQSh-ty kinálap otyr.
Aıta ketelik HAMAS barlyq tutqyndy bosatýǵa daıyn ekenin málimdegen edi.