Ankaradaǵy lańkestik áreketten keıin qalalyq polıtsııanyń basshysy men onyń qaramaǵyndaǵy úsh qyzmetker jumystan bosatyldy
ASTANA. QazAqparat - Ankara polıtsııasynyń joǵary ókiletti úsh qyzmetkeri Túrkııa astanasynda bolǵan qos lańkestik áreketterden keıin qyzmetterinen bosatyldy, dep habarlady sársenbi kúni eldiń ІІM-ne silteme jasaǵan jergilikti BAQ-tar.
Másele Ankara provıntsııasy polıtsııasynyń basshysy men barlaý jáne qoǵamdyq qaýipsizdik bólimderiniń jetekshileri týraly bolyp otyr.
Ankarada 10 qazan kúni qalalyq vokzaldyń qasynda bolǵan qos lańkestik áreket 97 adamnyń ómirin qıyp áketti, taǵy júzdegen adam jaraqattandy.
Túrkııada bul jarylystarǵa «Islam memleketi» tobynyń músheleri qatysy bar dep esepteıdi.
