Ankarada jańa VIP áýejaı ashylady
ASTANA. KAZINFORM – Túrkııa astanasynda Etımesgýt áskerı aerodromyn aýqymdy jańǵyrtý bastaldy. Ol 2026 jyldyń shildesinde ótetin NATO sammıtine oraı eldiń negizgi VIP jáne úkimettik áýejaıyna aınalady, dep habarlaıdy Kazinform menshikti tilshisi.
Ankara jańa strategııalyq nysan – memlekettik mańyzy bar VIP áýejaıyn salýǵa daıyndalyp jatyr. Jobada 1930 jyldary qurylǵan jáne Mustafa Kemal Atatúrik bir kezderi planerler mektebiniń ashylýyna jeke ózi qatysqan eń kóne áýejaı – Etımesgýtti tolyqtaı qaıta qurý qarastyrylǵan.
Túrik BAQ málimetinshe, jańa áýejaıdy basqarý Túrkııa memlekettik áýejaılary basqarmasyna (DHMI) beriledi, bul rette jer Qarýly Kúshter Bas shtabynyń menshiginde qalady. Jumysty túriktiń Sera İnşaat kompanııasy júrgizip otyr, al qurylysty aıaqtaý 2026 jyldyń shildesine, Ankaradaǵy NATO sammıtine qarsy josparlanǵan.
Jobaǵa aıtarlyqtaı tehnıkalyq jáne ınfraqurylymdyq ózgerister kiredi:
* Ushý-qoný jolaǵy 3 km-ge deıin uzartylyp, 60 metrge deıin keńeıtiledi.
* Bir ýaqytta 50 ushaqqa qyzmet etýge eseptelgen eki úlken perron salynady.
• Áýejaı Airbus A380 sııaqty eń iri ushaqtardan basqa barlyq derlik ushaq túrlerin qabyldaı alady.
• Prezıdentter, premer-mınıstrler jáne resmı delegatsııalarǵa arnalǵan aýdany 2400 m² bolatyn zamanaýı termınal salynady.
Sonymen birge, áýejaı kommertsııalyq reıster úshin jabyq bolady – ony tek úkimettik ushaqtar men VIP qonaqtar paıdalana alady.
Buǵan deıin Ystanbul halyqaralyq áýejaıy (İGA) jyl saıynǵy bes juldyzdy áýejaılar reıtıngi boıynsha otbasyly adamdar úshin álemdegi eń jaıly áýejaı atanǵanyn jazǵan bolatynbyz.
Sondaı-aq Ystanbul áýejaıy Eýropadaǵy eń kóp jumys isteıtin áýe aılaqtarynyń reıtıngin qaıta bastap, áýe qatynasynyń qarqyndylyǵy boıynsha álemdik reıtıngte besinshi oryndy ıelengenin jazdyq.