Ankarada túrkitildes elderdiń yntymaqtastyǵy talqylandy
NUR-SULTAN. QazAqparat – Qazaqstan Elshisi Abzal Saparbekuly jáne Túrki keńesiniń Bas hatshysy Baǵdat Ámireev Túrkııa Respýblıkasynyń Vıtse-Prezıdenti Fýat Oktaımen kezdesti, dep habarlaıdy QR SІM baspasóz qyzmeti.
Kezdesýde túrkitildes memleketterdiń yntymaqtastyǵy jan jaqty talqylandy. Atap aıtqanda Túrki keńesiniń túrkitildes elderdiń ıntegratsııasyndaǵy aıryqsha róline toqtaldy.
Sondaı-aq, aldymyzdaǵy ýaqytta túbi bir túrki jurtynyń rýhanı besigi - Túrkistanda ótkizilýi josparlanǵan Túrki keńesiniń beıresmı sammıti egjeı-tegjeıli talqyǵa salyndy.
Budan bólek, Qazaqstan men Túrkııa arasyndaǵy ekijaqty yntymaqtastyqtyń strategııalyq mańyzdylyǵy atalyp, kún tártibindegi ózekti máseleler boıynsha pikir almasyldy. Ásirese, saıası, saýda-ekonomıkalyq, ınvestıtsııalyq jáne taǵy basqa salalardaǵy yqpaldastyqtyń tıimdi tetikteri talqylanyp, osy baǵyttaǵy jumystardy baýyrlas halyqtardyń ıgiligi úshin budan ári jalǵastyrý kelisildi.
Sonymen qatar, Qazaqstan Premer-Mınıstri Asqar Mamın men Túrkııa Vıtse-Prezıdenti Fýat Oktaıdyń teń tóraǵalyǵyndaǵy Úkimetaralyq ekonomıkalyq komıssııanyń is-sharalary josparynyń oryndalý barysy jáne aldaǵy ýaqytta onlaın formatta ótetin basqosýdyń kún tártibi tilge tıek boldy.
