Ankarada túrik balalary Qazaqstannyń ánuranyn shyrqady

ASTANA. QazAqparat - Ankarada Qazaqstan Táýelsizdiginiń 26 jyldyǵy jáne Qazaqstan men Túrkııa dostastyǵynyń 25 jyldyǵyna arnalǵan saltanatty qabyldaý ótti, dep habarlaıdy QazAqparat tilshisi.

Saltanatty jıynda Ankaranyń «Synav» kolledjiniń tórtinshi synyp oqýshylary Qazaqstannyń ánuranyn oryndady.

«Bul jobany Túrkııadaǵy Qazaqstan Elshisi Abzal Saparbekulynyń usynysymen saltanatty qabyldaýǵa arnaıy ázirledik. Osylaısha, Qazaqstan men Túrkııanyń dostastyǵyn kórsetkimiz keldi. Árıne, ońaı bolmady.  Eki apta boıy túrik balalaryna qazaqsha sózdi úıretip, maqamyn durystadyq. Olar ánurannyń aldymen sózin jattady, sodan keıin ánin úırendi», - deıdi «Otaý» ansambliniń jetekshisi, Qazaqstan Respýblıkasynyń mádenıet qaıratkeri Elmıra Shendýran.

Eske sala ketsek , buǵan deıin Túrkııanyń ártúrli qalasynda turatyn 26 túrik azamaty Qazaqstannyń táýelsizdik merekesi qurmetine qazaq baıraǵyn jelbiretip, Qazaqstannyń ánuranyn shyrqaǵan edi.