Ankarada terakt uıymdastyrǵan 2 adamnyń kózi joıyldy
ANKARA. KAZINFORM – Buǵan deıin Túrkııanyń Ankara qalasynda áskerı ushaqtar men ǵarysh tehnıkasyn shyǵaratyn «TUSAŞ» korporatsııasy ǵımaratynyń mańynda terakt bolǵanyn habarlaǵan edik. Bul lańkestik áreketti uıymdastyrdy degen eki kúdikti mert boldy, taǵy bir adam bostandyqta júrgeni aıtylady. Bul týraly Túrkııanyń Sabah agenttigi habarlady.
Basylymnyń habarlaýynsha, jergilikti ýaqytpen saǵat 15:20 shamasynda Ankaranyń Kahramankazan aýdanyndaǵy «TUSAŞ» korporatsııasy ǵımaratynyń janynda bomba jaryldy. Jarylystar men oq daýsyn estigen qaýipsizdik kúshteri, órt sóndirýshiler men jedel járdem brıgadalary oqıǵa ornyna dereý jetken.
Túrkııa Іshki ister mınıstri Alı Erlıkaıa eki lańkestiń (áıel adam jáne er adam) kózi joıylǵanyn rastap, olardyń aty-jóni anyqtalyp jatqanyn habarlady. Ol sondaı-aq, sońǵy lańkes joıylǵanǵa deıin kúrestiń jalǵasatynyn aıtyp, resmı aqparat kózderiniń málimdemelerine qulaq túrýdi surady.
– Biz lańkesterdi anyqtaýdy jalǵastyrýdamyz, olardyń kim ekenin anyqtaǵannan keıin olardyń qaı lańkestik uıymǵa jatatynyn habarlaımyz, – dedi mınıstr.
El prezıdenti Rejep Taıyp Erdoǵan BRIKS sammıti aıasynda Reseı prezıdenti Vladımır Pýtınmen kezdesýinde 4 adamnyń qaza taýyp, 14 adamnyń jaralanǵanyn habarlady.
– Osy jantúrshigerlik lańkestik áreketti aıyptaımyn, sheıitterimizge Alladan raqym tileımin, – dedi.
Eldiń Ádilet mınıstri Iylmaz Týnchtyń aıtýynsha, Ankara Bas prokýratýrasy lańkestik áreketke qatysty tergeýdi bastap, oqıǵany tergeýge bas prokýrordyń 1 orynbasary men 8 prokýror taǵaıyndalǵan.
