Ankarada Qazaqstan jastary arasynda fýtboldan jarys ótti
«Rýhanı jańǵyrý» memlekettik baǵdarlamasy aıasynda Qazaqstandaǵy Jastar jylyna oraı ótken is-sharaǵa Ankara, Stambýl, Izmır, Býrsa, Kastamoný, Konııa, Karabýk, Kaıserı, Sakarııa jáne Eskıshehır qalalalyrynyń jetekshi ýnıversıtetterinde bilim alatyn 300-ge jýyq qazaqstandyq stýdentter, magıstranttar pen doktoranttar qatysty.
Teńbil dop dodasynyń ashylý saltanatynda sóz sóılegen Qazaqstannyń Túrkııadaǵy Elshisi Abzal Saparbekuly ótken jyldyń qazan aıynda Elbasy Nursultan Nazarbaevtyń Qazaqstan halqyna Joldaýynda 2019 jyldy Jastar jyly dep jarııalaýdy usynǵanyn eske saldy.
«Memleketimiz sizderge úlken úmit artyp otyr. Elbasy Nursultan Nazarbaev atap ótkendeı, jastar elimizdiń básekege qabilettiliginiń mańyzdy faktory. Búgingi tańda tek memleketter arasynda ǵana emes, adamdar arasynda da básekelestik bar. Ǵylym men bilimdi kóteretin jáne jasampaz urpaq bolatyn el ǵana jeńiske jetedi», - dedi Elshi.
Sondaı-aq, Qazaqstan men Túrkııa arasyndaǵy baýyrlastyq qarym-qatynastardy atap ótken Elshi A.Saparbekuly Memleket Basshysy Qasym-Jomart Toqaevtyń halyqqa joldaýyna toqtala otyryp, Qazaqstan Respýblıkasy Prezıdentiniń janyndaǵy Jastar kadr rezervi bastamasy týraly baıandady.
Ashylý saltanatynda sóz sóılegen bilimgerler, jarysqa qatysýshylarǵa jyly lebizderin jetkizip, Elshi A.Saparbekulyna jastarǵa kórsetken qoldaýy úshin alǵystaryn bildirdi.
Ankara, Kaıserı jáne Ystanbul qalalarynan 2 quramalar, Izmır, Býrsa, Kastamoný, Konııa, Karabýk jáne Sakarııa quramalary qatysqan jarysta barlyǵy 12 top dodaǵa tústi. Jarysta Býrsa qalasynyń quramasy úzdik bolyp, ekinshi oryndy Ankara qalasynyń Kara Harp áskerı ýnıversıtetiniń quramasy, al úshinshi oryndy Konııa qalasynyń quramasy ıelendi.
