Ankarada Qara teńiz qaýipsizdigi máselesi talqylanady

ASTANA. KAZINFORM — Túrkııa astanasy Ankarada eki kún boıy Qara teńizdegi qaýipsizdikti qamtamasyz etý aıasynda kelissózder ótedi, dep habarlaıdy Kazinform tilshisi.

Túrkııanyń Ulttyq Qorǵanys mınıstrligi 15-16 sáýir aralyǵynda Ankara Áskerı-teńiz kúshteriniń shtabynda mańyzdy kezdesý ótkiziletinin jarııalady.

Talqylaýdyń negizgi taqyryby — Reseı men Ýkraına arasyndaǵy bitimge qol jetkizilgen jaǵdaıda Qara teńizdegi qaýipsizdikti qamtamasyz etý bolady.

Ulttyq Qorǵanys mınıstrligi málimdemesine sáıkes, is-sharaǵa shet memleketterdiń áskerı ókilderi, sonyń ishinde Reseıdiń áskerı qyzmetshileri de qatysady. Kezdesýge qatysýshylar Qara teńiz aımaǵynda beıbitshilik pen turaqtylyqty saqtaýǵa yqpal etetin teńiz salasyndaǵy áskerı josparlaýǵa nazar aýdarady.

Sonymen qatar jańa shıelenisterdiń aldyn alýǵa jáne jaǵalaýdaǵy elder arasyndaǵy yntymaqtastyqtyń turaqty júıesin qurýǵa baǵyttalǵan qadamdardy talqylaýǵa erekshe nazar aýdarylady.

Kezdesý nátıjeleri óńirlik qaýipsizdikti nyǵaıtýǵa jáne halyqaralyq áskerı ózara is-qımyl tetikterin keńeıtýge belgili bir úles qosady dep kútilýde.

Eki kún buryn Túrkııanyń keıbir basylymy Reseı men Ýkraına ókilderin Ankaraǵa Qara teńizdegi keme qatynasy qaýipsizdigi máselelerin talqylaýǵa shaqyrǵany týraly aqparat taratqany belgili boldy. Alaıda Kremldiń baspasóz hatshysy Dmıtrıı Peskov kezdesýge qatysty aqparatty rastamady.