Ankarada Abaı dańǵyly men aqynnyń bıýsti ashyldy
Abaıdyń týǵanyna 175 jyl jáne Ábý Nasyr ál-Farabıdiń týǵanyna 1150 jyl tolýyna oraı Ankara qalasy Gólbashy aýdanynda «Abaı jáne Farabı» jáne «Ustazdyń oralýy» kitaptarynyń túrik tilindegi aýdarmalarynyń tusaýkeseri jáne «Abaı dańǵyly» men «Abaı eskertkishi» ashylý saltanattary ótti.
Mańyzdy is-sharalar Túrkııadaǵy Elshiligi Ankara Gólbashy ákimdigimen birlese otyryp uıymdastyrdy.
Іs-sharanyń birinshi bóliminde belgili qazaq ǵalymy Aqjan ál-Mashanıdiń «Abaı jáne ál-Farabı» kitabynyń jáne jazýshy ári memlekettik qaıratker Ánýar Álimjanovtyń «Ustazdyń oralýy» kitabynyń túrik tilindegi aýdarmalarynyń tusaýkeseri jasaldy. Bul kitaptar Qazaqstannyń Túrkııadaǵy elshiligi men Eýrazııa jazýshylar odaǵynyń birlesken kúsh-jigeriniń nátıjesinde jaryq kórdi.
Qazaqstan men Túrkııanyń ánurandarymen bastalǵan is-sharanyń ashylý saltanatyn Gólbashy aýdanynyń ákimi Ramazan Shımshek jasady. Ol óz sózinde ál-Farabıdiń 1150 jyldyq mereıtoıyna jáne Abaıdyń 175 jyldyq mereıtoıyna arnalǵan osy mańyzdy is-sharanyń uıymdastyrylýyna úles qosýdyń úlken mártebe ekenin atap ótti.
Aqjan ál-Mashanıdiń «ál-Farabı jáne Abaı» kitabynyń jáne Ánýar Álimjanovtyń «Ustazdyń oralýy» kitabynyń túrik tiline aýdarylýyn uıymdastyrǵan jáne Túrki áleminiń ádebıet salasyndaǵy yntymaqtastyǵyna úlken úles qosyp júrgen Eýrazııa jazýshylar odaǵynyń prezıdenti Dr. ıAkýp Ómeroǵlý ál-Farabı jáne Abaıdyń Túrki-Islam órkenıetiniń damý protsesiniń eń sheshýshi kezeńinde ómir súrgenin jáne sol ózgeris kezeńinde halyqqa jetekshilik etkenin atap ótip, kitaptardyń Túrkııada ál-Farabı jáne Abaıdyń odan da keńirek tanylýyna úles qosatynyn aıtty.
TÚRKSOI-dyń Bas hatshysy Dúısen Kaseınov Túrki álemine ortaq uly qaıratkerlerdiń mereıtoılaryn atap ótý dástúrge aınalǵanyn atap ótti. Osy turǵyda Bas hatshy ál-Farabıdiń týǵanyna 1150 jyl, Abaıdyń týǵanyna 175 jyl tolýyna oraı kóptegen is-sharalar uıymdastyrǵanyn eske salyp, bul is-sharalar túrki halyqtary arasyndaǵy birlik pen baýyrlastyqty odan ári nyǵaıtatynyn aıtty.
Ankara gýbernatorynyń orynbasary Abdýllah Dólek aýdarylǵan kitaptardyń tusaýkeserine jáne dańǵyl men eskertkishtiń ashylýyna qatysqanyna óte qýanyshty ekenin bildirip, «Biz ál-Farabı men Abaı sııaqty abyroıly ómir súrgen ata-babalarymyzǵa laıyqty bolýǵa umtylýymyz kerek» dep málimdedi.
Tusaýkeser baǵdarlamasynda sóz sóılegen Qazaqstannyń Túrkııadaǵy Tótenshe jáne Ókiletti elshisi Abzal Saparbekuly Uly dala eli Qazaqstannyń ıdeıalary turǵysynan eń yqpaldy tulǵalarynyń Anadolyda tanytylýy Túrkııa men Qazaqstan arasyndaǵy rýhanı kópirlerdi qaıta qalpyna keltirýde mańyzdy ekenine nazar aýdaryp, Ábý Nasyr ál-Farabı men Abaıdyń qazaqtyń rýhanı áleminiń irgetasy ekenin atap ótti. Ár túrli ǵasyrda ómir súrgenine qaramastan, osy eki tulǵanyń arasynda sabaqtastyq bar ekenin aıtqan Elshi myrza: «Eki danyshpannyń da eńbekterinde bilim, ǵylym, izgilik, meıirimdilik pen kórkemdik týraly aıtylady. Sondyqtan, eki oıshyldyń jumysyn túsiný degenimiz – bul ózimizdi túsiný jáne taný degen sóz», - dedi.
Baıandamalardan keıin qutty bolsyn tilekteri aıtylyp, kitaptardyń lentalary qıyldy. Sonymen qatar, Abaı kórmesi de ótkizildi.
Qazaqstannyń Túrkııadaǵy elshiligi men Ankara Gólbashy ákimdigi birlesip ótkizgen sharanyń ekinshi bóliminde «Abaı dańǵyly» men «Abaı eskertkishi» ashylý saltanattary ótti. Saltanatta Abaı Qunanbaıuly týraly keńinen aqparat berildi. Belgili mýzykant jáne dombyrashy Arslanbek Sultanbekovtiń «Dombyra» áni men qazaqstandyq jas ónerpaz Ǵaınollanyń «Kóroǵly» kúıi is-sharany dúrkiretip jiberdi. Gólbashy aýdany ákimi Ramazan Shımshek óz sózinde bul dańǵyl men eskertkishtiń eki el arasyndaǵy baýyrlastyqtyń sımvoly ekenin basa aıtty.
TÚRKSOI Bas hatshysy Dúısen Qaseınov Abaıdyń 175 jyldyq mereıtoıy pandemııaǵa qaramastan keń kólemde atap ótilip jatqanyn málimdedi jáne Qazaqstannyń elshisi Abzal Saparbekulyna ásirese onyń mádenıet jáne óner salasyndaǵy qyzmeti úshin rızashylyǵyn bildirdi. Qaseınov «Abaı dańǵyly» men «Abaı músinin» ashýǵa múmkindik bergeni úshin Ankara Gólbashy ákimdigine alǵysyn bildirip, «Bir bolaıyq, tiri bolaıyq, iri bolamyz, bar bolaıyq!» dedi.
Saltanatty rásimde sóz sóılegen Qazaqstannyń Túrkııadaǵy Tótenshe jáne Ókiletti elshisi Abzal Saparbekuly Gólbashy ákimdigine qazaq halqynyń atynan alǵys bildirip, «Baýyrlastyǵymyz máńgi jalǵasyp, kúnnen-kúnge nyǵaıa túse bersin!» dedi. Ashylǵaly turǵan Abaı músinniń sáýletshisi - qazaqstandyq músinshi Murat Mansurovtyń sonymen birge Túrkııadaǵy eń úlken Kóroǵly eskertkishiniń músinshisi ekenin jetkizgen Saparbekuly eskertkishtiń turǵyzylýyna qoldaý kórsetken Qazaqstan Respýblıkasynyń Nevshehır qalasyndaǵy Qurmetti konsýly Halıl Ýúlerge alǵysyn bildirdi.
Baıandamalardan keıin bata jasalyp, Abaı dańǵyly men Abaı eskertkishiniń lentalary qıyldy. Saltanatty rásimge Túrki Keńesiniń Bas hatshysy Baǵdat Ámreev, TÚRKSOI Bas hatshysy Dúısen Qaseıinov, Ankara gýbernatorynyń orynbasary Abdýllah Dólek, Gólbashy máslıhatynyń músheleri, burynǵy mınıstrler, stýdentter, Gólbashy turǵyndary jáne Ankarada turatyn qazaqtar qatysty.
