Ankara meri Karlovqa oq atqan er adam polıtseı bolǵanyn rastady
ASTANA. QazAqparat - Ankara meri Melık Gekchek Túrkııada Reseı elshisi Andreı Karlovqa oq atqan er adam polıtseı bolǵanyn málim etti.
Buǵan deıin buqaralyq aqparat quraldary shabýyl jasaǵan adam fotokórmege polıtsııanyń qyzmettik kýáligin paıdalanyp kirýi múmkindigin habarlaǵan bolatyn.
«Shabýyl jasaǵan - polıtseı», - dep jazdy mer «Tvıtterdegi» óziniń akkaýntynda.
Reseı elshisi 19 jeltoqsan kúni Ankarada «Reseı Kalınıngradtan Kamchatkaǵa deıin» atty kórmeniń ashylýynda sóz sóıleý barysynda atyp óltirildi. Tapanshamen qarýlanǵan er adam elshige oq atqannan keıin «Allahý ákbar! Allepo týraly umytpańdar! Sırııa týraly umytpańdar!», dep aıǵaılaǵan (keıin vıdeo ınternetten alynyp tastaldy).
Frans prestiń jazýynsha, vıdeo men fotosýretter jarııalanǵannan keıin áleýmettik jelilerdiń paıdalanýshylary oq atqan qylmyskerdiń tulǵasyn anyqtaýǵa kirisken. Al túrik basylymdarynyń biri er adam Ankarada polıtsııa quramyndaǵy arnaıy jasaqta qyzmet etkendigin jazdy.
Mer Gekchek sondaı-aq, oq atqan adam Fethýllah Gúlenniń jaqtastary shoǵyrlanǵan ǴETO tobynyń (Túrkııa bıliginiń senimi boıynsha) múshesi bolýy múmkin degen boljam jasady. Bılik ókilderi Gúlendi 2016 jyldyń jazynda áskerı tóńkeristi uıymdastyrdy dep aıyptaǵan edi.
Ankara meri «Tvıtterdegi» óziniń jazbasynda, shabýyl jasaǵan er adamnyń qylmystyq áreketi 2016 jyldyń jazynda ǵana retke keltirilgen Reseı men Túrkııa arasyndaǵy qarym-qatynasty qaıta ýshyqtyrý talpynysy bolyp tabylatynyn aıtty.
RF SІM Andreı Karlovtyń óltirilgeni týraly aqparatty rastap, oryn alǵan jaǵdaıdy lańkestik ekendigin aıtty. Jáne bul máseleni BUU Qaýipsizdik keńesiniń talqysyna shyǵarýǵa ýáde etti. Andreı Karlov Túrkııadaǵy elshilik qyzmetine 2013 jyldyń 12 maýsymynda kirisken edi. Aıta keteıik, sońǵy kezderi Túrkııada Sırııadaǵy reseılik saıasatqa qarsy aktsııalar jıi ótip turdy.
