Ankara mańynan 66 mln jyl burynǵy teńiz ulýynyń qaldyǵy tabyldy
ASTANA. KAZINFORM – Túrkııa astanasy Ankaradaǵy arheologııalyq qazba jumystary kezinde Tetıs teńiziniń jaǵalaýynda 66 mln jyl buryn tirshilik etken teńiz ulýynyń qazba qaldyǵy tabyldy, dep habarlaıdy Anadolu agenttigi.
Qazba Ankaranyń Golbashy aýdanyndaǵy Oıaja eldi mekeninde ornalasqan Kúlhóıúk arheologııalyq ornynda júrgizilgen jumystar barysynda tabylǵan. Bul týraly Túrkııanyń Mádenıet jáne týrızm mınıstri Mehmet Nýrı Ersoı áleýmettik jelidegi paraqshasynda málimdedi.
– Golbashynyń Oıaja aımaǵyndaǵy qazba jumystary kezinde 66 mln jyl buryn Tetıs teńiziniń jaǵalaýynda tirshilik etken teńiz ulýynyń qaldyǵy tabyldy, – dedi mınıstr.
Teńiz ulýlary – ulýlar men shyryshty jándikterdi qamtıtyn mollıýskalar klasyna jatatyn jándikter.
Ǵalymdardyń paıymynsha, qazba qaldyq Tetıs teńiziniń sońǵy kezeńderiniń birine jatady. Bul – shamamen 250 mln jyl buryn qalyptasa bastaǵan jáne qazirgi Ortalyq Anadolynyń bir bóligin alyp jatqan ejelgi sý aıdyny.
Zertteýshiler qazbanyń Tetıs teńiziniń sońǵy kezeńine jatatynyn atap ótti. Alaıda onyń Kúlhóıúk turǵyndary tarapynan myńdaǵan jyl buryn qonysqa ákelinýi múmkin degen boljam da bar. Bul jaıt tabylǵan jádigerdiń mańyzyn arttyra túsedi.
Kúlhóıúk shamamen 5 myń jyl buryn paıda bolǵan, hett jáne hattı órkenıetterimen baılanysty ejelgi qonys sanalady. Sondyqtan qazba qaldyqyndaǵy tirshilik ıesi qonys turǵyndarymen bir kezeńde ómir súrmegen.
Endi zertteýshiler ejelgi turǵyndardyń qazbany basqa jerden taýyp, Kúlhóıúkke ádeıi ákelgen-ákelmegenin anyqtaýǵa tyrysady. Bul nysannyń qonysqa qalaı jetkeni jáne ejelgi adamdar úshin qandaı máni bolǵany da zerttelmek.
Kúlhóıúkten buǵan deıin de mańyzdy olja tabylǵan. Arheologtar 4 myń jyl burynǵy hett dáýirine jatatyn ydystyń ishinen Ankaraǵa tán «Sevgı gúliniń» («Mahabbat gúli») eń kóne tuqym qaldyqtaryn anyqtaǵan.
Kúlhóıúktegi qazba jumystary 2021 jyldan beri júrgizilip keledi. Uzaq merzimdi arheologııalyq baǵdarlama Túrkııa prezıdentiniń qoldaýymen júzege asyrylýda. Zertteý jumystaryna Ankara ýnıversıteti men Mádenıet jáne týrızm mınıstrligi atynan dotsent Derıa Iylmaz Tekın jetekshilik etedi.
Mınıstrdiń aıtýynsha, qazba jumystary jalǵasyp, Kúlhóıúktiń tarıhyna qatysty jańa derekter anyqtala beredi.
Eske sala ketsek, jaqynda SQO-da qum karerinen eki adamnyń jáne muz dáýirindegi múıiztumsyqtyń súıekteri tabyldy.
Sondaı-aq Chehııada Stoýnhendjden myń jyl buryn salynǵan kóne qurylys tabylǵanyn jazdyq.
